‘’i wakken ad ak-d-smeḥsen yimḍebbren-agi-nne&gamma,; ilaq ad tgezmeḍ abrid, d wa kan i d ameslay i snen…’’ akka i aγ-d-yebda awal Brahim yiwen gar wid i d-yessawlen γer unegzum n ubrid ass n lexmis iεeddan i wakken dγa ur d-yettili ara ssuq ass n lğemεa di Tala Athmane. Am waken neẓra yal ddurt yettεemmir ssuq-agi. ‘’Taddart-nneγ teḍḥa-d d taneggarut gar tudrin n tγiwant n Tizi Wezzu. Ayen i d-yessekcam ssuq neγ la zone industrielle i d-yezgan deg wakal-nneγ ur aγ-d-iṣuḥ deg-s kra. Nettwaḥqer mačči d izli. Nekni kan nefreq, nutni ufan-tt fell-aneγ’’ ikemmel yenna Said yiwen gar wid ara yeddun ad yemmeslay akked lwali imi i asen-d-yessawel γer yiwet n temlilit. Timlilit-a tella-d s lemεawna n APW n Tizi Wezzu. Uqbel ad rren s leğwab i lwali, tennejmaε taddart u fran-tt gar-asen : ad ruḥen γur-s meεna ilaq ad asen-d-yefk ttiεad i tifrat n wuguren-agi-nsen, ma ulac ad uγalen γer unegzum n ubrid, yerna tikelt-a ad gezmen ula d abrid aγelnaw. Gar wayen ṭtalaben imezdaγ-a ad naf : ugur n waman, leεqud n wakal, lemεawna n lebni, iberdan, asufeγ n yiḍuman, lebni n uxxam n yilmeẓyen, ṭṭbib di dispensaire d wayen-nniḍen…
Tamsalt-a tesban-d i tikelt tamezwarut tadukli yellan gar yimezdaγ n taddart n Tala Athmane imi akken ma llan, ilemẓi amγar, mtafaqen γef yiwen rray. Mačči am yinejmuyaε iεeddan anda i d-yettili imenγi γef ciṭ kan n sebba. Akka i aγ-d-nnan wid iḥedren i temlilit. Mebla ma nettu anegzum-agi n ubrid qrib i d-yegla s cwal gar tudrin imi imezdaγ n wagennun ur bγin ara imi γettwaγleq ssuq ladγa imekkasen d wid izedγen di tama-nni. Iḥun Rebbi imezdaγ n Tala Athmane zwaren leεqel d tirrugza deg umeslay-nnsen mi qublen imdanen-agi.
Hocine . M