Qqaren at zik: “Aḥbib ma yebra i wallen-is yewwi-yi-d ad at-saɛfeɣ , ar d-yuɣal ar leɛqel-is a yi-d-yaf mazal futeɣ”.
Seg yiḥbiben wid-nni i ɣ-yellan deg ul , neqqar yessemlal-aɣ-d lḥir ɣef teqbaylit , lḥir ɣef yidles-nneɣ, ad d-yessayes amur gar idelsan nniḍen… Gar yiḍ d wass ukren taqejjart ɣer deffir , rran agad-nni ixeddmen lecɣal seg ul-nnsen d nutni ur tt-yebnin ara ɣef ṣṣeḥ ; ziɣ d nutni ur nessawaḍ ara tameddit , iiiiiiiiiiiiiiiih! Ssiweḍ akaddab ar tawwurt! Meɛna, awal d awal kan , yuɣ lḥal d awal kan i ɣ-iɛemren , cuffen-aɣ aqendur , nufeg ur nris !D timcukkal i ɣ-id-negra , neɛweq! Lammer d lebɣi-k ay ul, aḥbib d win ara k-yemmlen lɛib-ik, maci d win ara k-yemḥun seg ubrid-is mebla ma yenna-yak ma zzant neɣ rɣant… ɣelṭen ak medden ay iḥbiben!
Seg yiḥbiben nniḍen wid d wi ɣ-sdukklent tlufa, d tiqdimin neɣ d tijdidin, aqdim yekkat deg ujdid ajdid ad yuɣal d aqdim… Tilufa, yal wa amek ttɛeddint fell-as, wa ad ɛeddint fell-as am uzaylal, ur iɛellem ur igezzu alamma glant s uqerruy-is, wayeḍ ttɛeddint fell-as d netta yetswali, ur yezmir i kra… D tilufa n yiḥbiben, ma yeqqim yedda ma yruḥ ur yerbiḥ kra.
Seg yiḥbiben nniḍen wid d wi ɣ-tezdi tikli , uuuuuuuh! Qqaren-ak tikli amek akken ! wa yeqqar tedduɣ ur zriɣ sani, wa iḥqa-nni yeḥsa anda yteddu seg wasmi yebda tikli, ma yneṣṣef abrid yini-ak ziɣ ur yessufuɣ ara, iiiiiiiih! I telha tikli meɛna kan akka !.
Iḥbiben, wid-nni ɣef nettcirriw yal mi ara d-nebder isem-nsen ! Aqli-ken da , yal wa ad yissin iman-is: seg wid-nni werǧin ẓrant wallen, seg wid nni i ɣ-yellan deg ul, ad ilin deg ul xas lweɛd iteqqes!
Wis ma llan yiḥbiben ara k-yinin: “da tesweqmeḍ, da tesxesreḍ,meɛna ur cukkeɣ ara ad tneqseḍ di lqima, axaṭer lewqam d lexṣara fell-ak fell-i!”
Iḥbiben, d wid i ɣ-igan ccan, wid-nni yumnen yiwen wass a tt-nbeddel: “Ziɣ mazal lxir ar zdat!”
Zira.