I tikelt tamezwarut ara d-teḍṛu deg umezruy n uselmed aεlayan n tmaziγt i yebdan nnig n 20 iseggasen aya deg sin n yigezduyen n tutlayt d yidles amaziγ n Tizi Wezzu d Bgayet. Ass n lexmis iεeddan, neḥḍer i tsalelt n Mouhand ou Ramtane Ighit, anelmad n lmajistir n tmaziγt di tesdawit n Bgayet, akk wid iḥeḍren ama d inelmaden neγ d iselmaden yuγal-iten-id ussirem mi slan i umeslay γef tussna s tmaziγt. Mouhand ou Ramtane i yeṛẓan asalu, yegga yiwet n tezrawt γef umawal n tfellaḥt umi isemma : « Tazrawt taseknirmant n umawal n tfellaḥt n teqbaylit – Etude terminologique du lexique agricole kabyle » ; akatay(mémoire) i d-yesken zdat n yinesγuma(jury) γef uqqerru-nsen Dr Mohand Akli Salhi (tasdawit n Tizi Wezzu), yemmug s tmaziγt s lmendad n pṛufisur Kamal Bouamara (tasdawit n Bgayet).
Akken ad nesmekti, yuγ lḥal aṭas n yiseggasen aya ideg inelmaden n lisuns tamaziγt n tesdawit n Bgayet, ttarun ikatayen-nsen s tmaziγt, tirmit-a n Mouhand ou Ramtane mebla ccek seg mesya γer zdat ad ilin wid ar tt-iḍeffren, imi tamaziγt tutlayt-nneγ εzizen, tezmer ula d nettat ad temmeslay γef tussna.
Wi d kra n laṛyuy i d-nejmeε γer wid iḥeḍṛen i tsalelt n Mouhand ou Ramtane :
Amaoui Mahmoud (aselmad n tesnilest, Bgayet) : « Igerrez aṭas, iban-aγ-d belli nezmer ad nemmeslay s tmaziγt γef tussna ».
Aziz Hassani (tiẓrigin Tira) : « Ma yella lebγa kulci yeshel ».
Mustapha Tidjet (aselmad n tesnilest, Bgayet) : « D lεali-tt, d tirmit igerrzen ».
Mohand Akli Salhi (aselmad n tsekla, Tizi Wezzu) : « D ayen igerrzen nezzeh ».
Brahim Tazaghart (amyaru, ameγnas) : « Ass-a neḥḍer i yiwet n tgnit yesεan tixuṭṭert tameqrant deg ayen yeεnan asekfel d usetrer n tmaziγt, d ayen ara s-d-yerren azal , ara tt-yesεeddin γer unnar ussnan, abrid-a n useqdec n tmaziγt di tussna, yettak lǧehd akken amdan ad yelḥu γer zdat ». Takfarinas Belache (anelmad n lmajistir n tmaziγt, Bgayet) : « Ass-a feṛḥeγ mliḥ imi nerẓa asalu, nessaram ad ilint tiyaḍ yecban ta ».
Hamek Brahim (aselmad n tesnilest, Bgayet) : « Ncallah tirmit-a ad teǧǧ tamaziγt ad tekcem taγulin yemxalafen ama d tiknulujiya neγ tussniwin-nniḍen ». Djamel Mirabet d Boumedjane Hocine (imeγnasen n MCB) : « Ass-a neḥḍer amek i tebda tetteffeγ targit, targit n nnig n 30 n yiseggasen n umennuγ akken tamaziγt ad tuγal d tunṣibt di tmurt-is ; yuγ lḥal s umennuγ i d-newwi sin n yigezduyen n tutlayt d yidles amaziγ di tesdawit n Tizi Wezzu d tin n Bgayet, s tsalelt-a umi neḥḍer nezmer ad nini belli tamaziγt tleḥḥu γer zdat, simal teǧuǧǧug ».
Kamal Bouamara (amyaru, aselmad n tsekla, Bgayet) : « Tisalalin (les soutenances) s tmaziγt d ayen igerrzen aṭas, ncallah ad ilint tiyaḍ , mass Mouhand ou Ramtane Ighit, yeldi-d tawwurt i wiyaḍ, tijmilt-is d tameqrant ».
Mouhand ou Ramtane Ighit : « Bγiγ ad afgeγ seg lfeṛḥ, tidet kan, d aḥulfu ur nesεi tabadut, ur yezmir ad d-yessefhem yiwen s yimeslayen ».
Mokrane Chikhi