Deg unaɣur n unebdu n leḥṛuṛ, yelha ubeḥri n tlelli…abeḥri i ɣ-yessidiren di tizi n tisselbi.Tamuɣli tamezwarut tewwet deg ul am lebraq. Tisuqas n wussan n wegris d usemmiḍ, imeṭṭi am zun d iẓeblac.kulci yegres, yuli-t usemmiḍ am wadal.Abeḥri n tlelli imi ara yesself i ṣṣura, tettcirriw, tettmektay-d i tt-yeggunin, deg uneɣluy n yiṭij ! Ṭṭlam yesberber fell-as, idel-itt, iqdeɛ-as ula d azeɣbub n tafat. Tiṭ tettaker asekkud s agemmaḍ amer yella kra ara d-yerren tiqit. Llebsa-s d tamellalt, zeddiget am wul-is. Iteddu yettezmumug, am win ara ymagren lehna, am win ara ymagren lmalayek tiyeffusin. Ur telli tugdi, ur yelli lxuf. Tiɣimit s idisan-is, i lemni, deg wegni n tlelli. Zzeṛb uɣanim yelli tiwwura n lebɣi s ubeḥri n tlelli. Allen ttemsmuqulent, la ttanint di ṣṣura, d afaṛes ula d tamuɣli. Iles iseṛṛeḥ icennu tiwenziwin, yettcewwiq tifeswin n wul, di tizi n lɣila. Awal yesni d azrar ɣef zzin imceṛcaṛ. Ayen akken zegglen wussan, ad t-id-cefɛen wuḍan . Lbenna n wawal am zun d lxir. Ymedel ccfeṛ, gar yiḍ d wass, isuḍ-d waḍu n leḥzen, yesseḥdaqqer ulawen. D ssfeṛ uberriq ur nesɛi amḍiq. Axxam yuli s llsas, deg-s asalas, deg-s ajgu alemmas. Llufan deg dduḥ, la ten-id-yettlaɛi. lemcihwa n wurar tessengar, ur tettili tmeddit, ur yettili liser, tesnernay lebɣi n tmara, tessettuy ansi i d-nekka, temmal abrid s aẓekka…
Zira