Tiddukla tadelsant « Talwit » akked yimezdaγ n temnaḍt n At Σebdlmumen, n lwilaya n Tizi-Wezzu, s tallelt n tmehla n yidles n temdint n Tizi-Wezzu, suddsen-d yiwet n tejmilt s wazal-is deg uxxam n yidles n Lmulud At Mεemmar i yiwen n ujgu n umezgun d tẓuri tazzayrit Arezki Rabah, yettwasnen s yisem n tẓuri Abou Djamal. Anaẓur-agi yeεzel-it waṭṭan deg unnar n tẓuri acḥal d iseggasen.
Ass n 13 di yulyu n ddurt-agi yezrin, tuγal-as tejmilt deg tzeqqa tamecṭuḥt n uxxam n yidles s teγzi n yiwen n wass s yiwen n wahil fessusen, anda tella temzikent akked kra n yisura anda i d-yurar unaẓur-agi, syen yella-d yiwen n usarag n sin n yinaẓuren Ammar Laskri d Rabah Admin. Inaẓuren-agi wwin-d awal γef umecwar n tẓuri i yexdem Abou Djamal, d wuguren n yal ass i ttidiren yinaẓuren izzayriyen sumata. Syen gren-d tiγri i yimḍebren εlayen i tennul temsal akken ad fken izerfan i unaẓur akken iwata.
Yuγal umeslay i Abou Djamal, anda yessuter deg yimḍebren εlayen n twilayt n Tizi-Wezzu akken ad as d-fken afus n tallelt d kra n ttawilat n tudert akken ad yebnu xerṣum axxam i twaccult-is deg temnaḍt n At Σebdelmumen, yuγal yemmeslay-d γef wuguren yettidir yal ass, dγa s yimeṭṭi yenna: » acḥal iseggasen i xedmeγ i lfayda n tẓuri d umezgun Azzayri, ur tufiḍ i aγ-d-iṣaḥen ala 14000 n yidinaren i waggur ». Kra n wid yellan daxel n tzeqqa kkren, bedden, kkaten-as afus, maca sḥasfen merra deg wayen i slan. Akka, tettγaḍ liḥala n unaẓur.
Abou Djamal ilul ass n 14 di meγres 1938 di La Casbah. Yuli γef telwiḥin n umezgun asmi yesεa 10 n yiseggasen di lεmer-is. Yekcem imir γer terbaεt n Keltoum, γer tama n Rouiched, Nouria, Fadhila Dziria, Latifa…
Deg useggas n 1950 yurar akked Mohamed Touri deg yiwet n tceqquft n Rouiched « Quelle Toupie ». Di 1952, Abou Djamal yekcem γer terbaεt n Fernandez, s yen deg useggas n 1953 yekcem γer terbaεt taγiwant i yesselḥay Bachtarzi. Yuγal daɣ yekcem γer Radyu taγelnawt d Tilizri deg useggas n 1956, uqbel ad yekcem γer Tirni n uslelli Aγelnaw FLN, anda i yettwaḥbes acḥal n tikkal anda yettwaεteb s ufus n lεesker n Fransa.
Azekka-nni n tmunent tazzayrit, Abou Djamal yekcem γer terbaεt Boubegra, Omar Ouhada, Mustapha El Anka. deg 1964 yekcem s wudem unṣib γer Umezgun Aγelnaw Azzayri,anda i d-yurar deg waṭas n tceqqufin gar-asent, El Ghoula (L’Ogresse) akked Rouiched, El-Machhah(l’Avare) akk d les Concierges.Di 1970, Abou Djamal yekki deg yiwet n tedwilt n tilizri i warrac imecṭaḥ « Hadikati Essahira », i d-yessufeγ Zoheïr Abdelatif. Yurar-d deg waṭas n yisura iberraniyen akked unaẓur ameqqran n tmurt n Fransa Jean Gabin (Pépé le Moko) akked umsufeγ Vittorio Gassman (Broncaleone en croisades).
Islam Bessaci