Am yal aseggas, kra n wussan uqbel ad d-yaweḍ remḍan ad yekker wah ruḥu deg yimdanen. Di tazwara, d iɣmisen-nni ara d-yessiwḍen isallen yesserhaben: “ata-n iɣallen n laman ssawḍen ad ṭṭfen yiwet n terbaɛt yettuselḥen deg tama n …tettheggi ad tesker yiwen n ubaxix deg tmaneɣt deg wussan-agi n remḍan.” Neɣ ahat:” iḍelli, ssawḍen yiɣallen n laman ad nɣen yiwen n urebrab, d mmi-s n …d aqehhar, iɛebba acḥal d lbumbat ara yesṭerḍeq zdat n uxxam n …di tmaneɣt”. Amek ihi, ur d-tɣelli ara tugdi ɣef medden, ladɣa deg waggur yecban wa, anda ɛawaz d umerreḥ deg yiḍ i d azamul-is.
Si tama nniḍen, remḍan d tagnit i waṭas n yimeṭjaren i t-yettrajun iwakken ad ssikeslen tadrimt, imi deg waggur-a, ssuma n tuget n yisafaren tessemɣi-d afriwen, tekka nnig n tezmert n yixeddamen.
Amek ihi, ifelfel yettnuzu s 70 n yidinaren, ṭumaṭic s 40 n yidinaren, lqehwa tewweḍ ɣer 530 n yidinaren i kilu, rnu ssker s 100 n yidinaren. Aya, mebla ma nebder-d akk isufar, imi ulac win I d-ineqsen deg ssuma. ḥala timerna i nettwali. Ma d aksum n ubeqri neɣ n uɣelmi, yejgugel kan deg ssuma-s, mi akken tin n yiyuzaḍ tuli acemma.
Ayen yettḍurrun taxriḍt n umdan deg waggur n remḍan d timaqracin-nni I yettilin deg lawan-a am zlabia d tẓidanin nniḍen. Aseggas yezrin, asafar-agi yettnuzun s waṭas ilmend n tizeḍt-is yewweḍ ɣer 180 n yidinaren I kilu. D acu kan aseggas-a imi tennerna ssuma n zzit, mebla ccekk widak I tt-ixeddmen ur snuzuyen ara am zik, d timerna kan ara yilin diɣ. Annect-a akk ɣef uzagur n uxeddam meskin, ur nettaf idis iɣef ara yeɣli: fad, laẓ d leɣla n yisufar.
S ya ɣer da, ad nsel i yimḍebbren qqaren-d d akken ad tili lɛassa ɣef yisafaren I yettnuzun, ama seg tama n ssuma neɣ ayen i icudden ɣer tezmert n umdan. Maca, ar tura ur nezmir ad d-nini kra, imi leɣla yuɣ tiḥuna, asirem nneɣ ahat kan ad ilint tesquma ara iḥarben ɣef umdan di remḍan-a.
Am wakken i tella daɣ yiwet n taluft mucaɛen deg waggur-a: reffu ! awal sin, ad twaliḍ imdanen ttemceččawen am iyuzaḍ, yerna ɣef tlufa ur nesɛi lmeɛna. Ziɣ d aɛebbuḍ kan i deg-sen !
Sylia.