Di kra n wussan-a yezrin, sin n yimdanen di tɣiwant b Bechloul ruḥen s axxam n daira, mačči iwakken ad d-ssufɣen kra akka n lkaɣeḍ, maca iwakken ad d-beggnen lɣiḍ nsen segmi ur ten-id-tṣaḥ ara tnezduɣt. Ihi, msefhamen d akken ad qqimen dinna, ur tefɣen ara alamma wwin-d azref nsen. Dɣa, ama d ilmeẓyen neɣ d imeqranen rzan akk ɣer ɣur-sen iwakken ad bedden ɣer yidis nsen, imi s tidet llan seg wid meḍruren. tarbaɛt yefɣen, ad d-tass tayeḍ, imezdaɣ akk llan ɣer tama nsen. Asmi ur d-tban ara tifrat di temsalt-a, kkren yilmeẓyen n Bechloul rran tabburt i uxxam n daira, rnan tin n tɣiwant, rnu cerḍen seg yimḍebren ad frun tamsalt n sin n yimezdaɣ-agi. Ɣer tmeddit n wass, tennejmaɛ yiwet n tesqamut deg uxxam n daira, anda i iḥeḍren kra n yimdanen. Dinna dɣa i ttgezmen di rray iwakken sin n yirgazen-a yenḥafen ad awin amur nsen di tnezduɣt deg ufraq ara d-yilin deg wagguren i d-iteddun.
S kra n wayen akk i d-yellan deg unejmuɛ-a yettujerred deg yiwen n lkaɣeḍ ara yilin azekka d inigi ɣef rray yettwaṭṭfen. D ayen i yeǧǧan sin n yimdanen-a ad nnejmiɛen ɣer yixxamen nsen, imi ttwaqenɛen s wayen iɣer tessaweḍ tikli nsen.
Sylia. M