“Tiɣilt i yekfan fell-aɣ, ad d-tban mazal tayeḍ, …” akka i tt-id-yessefra Lounis ! Tamurt n leqbayel tegguma ad d-tessufeɣ aqerru seg waman, lhem yeṭṭafar wayeḍ, ad d-tiniḍ wissen aniwa i as-yedɛan. Ɣas akkan d idammen n warraw-is i yesswen tamurt iwakken ad yaɣ deg-s useklu n tlelli. Tizi temḍel di temcukkal n rrebrab d uxḍaf n warraw-is. Bgayet, yal ass d asuɣu n yimezdaɣ-is ɣef ddiq i d-yersen di liseɛ. Tubiret d Bumerdas ata-n ibges-d ɣur-sent rrebrab.
kra n wussan kan seg waggur n remḍan, d yiwet n lbumba i yeṭreḍqen di Tizi, tessegla-d s 33 n yimejraḥ. sin n wussan mbeɛd, d Tubiret ideg qrib yeḍra ubaxix. Rnu sin n wussan, d Bumerdas i yettwaḥuzan s tmettant n yiwen n uɛsekriw d ujraḥ n waṭas nniḍen. Taluft ur teḥbis ara da, imi s At Dwala i tewweḍ tmes s tmettant n yiwen n umessaltu d ujraḥ n kra n yimeddukal-is.
Aseqsi izedɣen allaɣ n uqbayli d win yerzan ssebba i yessawḍen tamnaḍt-a ɣer yir liḥala yecban ta. Acimi ddɣel d ucaḥur yers-d am ubruri ɣef tama-agi? Ur nezmir ad d-nini tettwalas di lḥeq, imi tewwi amur-is di tallit n 90.
S. M
Lesnam
Tiwaɣiwin n yiberdan ggtent
Deg yimalas yezrin, abrid aɣelnaw wis-5 iɛeddan ɣef temdint n Lesnam yuɣal d rreḥba i usficcet n tkeryas d tazla n yidammen, imi gar sin n wussan kan neḥḍer i snat n twaɣiwin n yiberdan yesseglan s terwiḥin n yimdanen. ass n ssebt iɛeddan, lewhi n 10 n sbeḥ, yiwet n tkerrust tamecṭuḥt i d-iruḥen s leɣṣeb teffeɣ i talast n ubrid-is iwakken ad temmager qbala yiwen n ukamyun ameqran. dɣa d abaxix i d-yeḍran, imi anehhar n tkerrust yemmut deg umḍiq ma d bab n ukamyun yettwajraḥ. Iɣallen n usellek i d-yewḍen kra n wakud kan mbeɛd mmugren lḥif ameqran iwakken ad d-kksen takerrust-nni si ddaw n ukamyun. ṣṣawḍen almi sxedmen ttawilat imeqranen. D ayen dɣa i yeǧǧan abrid yergel ɣef waṭas n kilumitr.
S. M