‘’Fad n Remḍan rnu-as win n bnadem ! Anwa leεqel ara tt-iqeblen ? Snat lmitrat γef ubaraj, nekni nectaq tiqit n waman !’’ Akka i aγ-d-tenna yiwet n tmeṭṭut mi truḥ, azal qayli di Remḍan-agi, γer lbir ad d-tagem. Iseggasen-agi ineggura, ttxassan waman di tudrin n tγiwant n At Σisa Mimun. Di tazwara, ttmeslayen yimḍebbren teεna temsalt γef lqella n ttawilat n usali n waman si lebyur n wasif γer tsebbalin. Syin, heddren-d γef tukerḍa n lpumpat d lexsas n waman deg wasif. Acu kan seg wasmi i cudden iqudas n waman γer ubaraj n Teqsabt, nwan imezdaγ taluft-agi ad tefru. Meεna ‘’d aγebbar s allen’’ akken i aγ-d-yenna T.T yiwen n ṭṭamen n taddart n Lazib n Ugni n Aεmer. ‘’Ilaq ad tefru temsalt-a uqbel ad yeḍru kra. Seg wass-n mi yebda Remḍan, ur nesεi aman. Yak tura rran-aγ γer ubraj, d acu n sebba ara d-afen ?’’ Ikemmel yesḥassef T.T.
Hocine. M