Kkren-d kra n yilmeẓyen n taddart n Semmache, deg tɣiwant n Leɛǧiba iwakken ad d-beggnen lɣiḍ nsen sdat n lixṣas n waṭas n yiḥricen n unegmu. taṣebḥit n wass, medlen tibbura n uxxam n tɣiwant anda i yuran ɣef kra n yibeḥnaq:”Neɛya deg uraju !” neɣ “ Anida-t lweɛd n yimḍebbren?”Ɣas akken d azɣal, maca wigi akka yerkeb lɣiḍ gguman ad brun i rray nsen. Ayen i asen-izegden lɣiḍ, ɣef leḥsab n wakken i d-nnan, mi akken ur ssawḍen ara mmeslayen d uselway n tɣiwant. Imir, ɛezmen ur ssusumen ara alamma yusa-d yimḍebber n daira n Bechloul. Ɣas akken yefka-asen-d lweɛd ad d-yass lewhi n tizwa, maca ur yessaweḍ ara d d-yaweḍ. D ayen i yernan zzit i tmes ! Azekka-nni, uɣalen-d yilmeẓyen-a, rnan medlen tibbura i wass wis-sin.
Ad d-nesmekti belli imezdaɣ-a n Semmache ssuturen deg yimḍebbren ad asen-d ssiwḍen aman ɣer yixxamen ad gen ttawil i waman yettwesxen, ad asen-bnun yiwet n tzeqqa i tɣuri, annar i wurar, tazeqqa i tujya, d waṭas n yiḥricen nniḍen.
S. M