Iṭij yudred kra ɣer lqaɛa, yeseknef s waqqaren-is ijdi n ṣhari, yeseḥluli iẓra yeggunin d isaggasen aya melmi ara d hubben leryaḥ ara d yawwin ambedel ɣef tmurt. Aɣemac ur neclig yesenddem tiregwa yuzlen, yesfad tibḥirin yemɣin, yesemudel lhu anda ma yella. Taẓayt n yiggenni teɣlid ɣef timizar anda tiselbi n yiwen tegla-d s tmettent n imyaten. Tenqedwa tagnit, yegla uzegzaw s uquran.
Ɣef aceyuḍ n unebdu, tenerna-d timhujrit izedɣen deg ul n yal asnaraf( dictateur) akken ijujaḥ n lfetna ad aɣent tirni. Tamselt n tmurt n Libya tbegened udem-is azulal ( absurde) am akken i la d tt-id tesbgen tadyant yetthuzun deg ussan-a tamurt n Surya.
Rṣas yettiẓẓifen si yal tama ixulfed lejraḥ, imeṭṭi, igujilen, tujal akked d unuɣni d ineẓman ur n fennu. Asnaraf yeggulen ur yeḥnit ad yerr tamurt d iɣiɣden si rrif alama d rrif yeṭṭef deg awal-is yesufɣed timajatin is akken ad yeṣḍad widen umu isemma “iɣerdayen” anda ma llan. Maca tirga teddun mxelfa! Tallit kan tenugdem teswiɛt.
Aḍu n tagrawla i d-iṣuḍen si Benɣazi yewweḍ ɣer leṣwar n Tripuli, akken kulci ad irrab ɣef lsas yebna umesbaṭli. Yeɣli win akken yenwen seg nnig –as ḥedd ur yelli. Zzman ma innuda ɣef ayla-s lmektub iteddu-as di lebɣi. Amdan ma yebɣa taɣawsa du leqrar ad yewweḍ lebɣi-s, ad ijab isufa n tafat xas deg yimmi n ṭlam. D tamsirt n tagrawla n Libya!
Teɣli Tiripuli deg ifassen n widen yecehwen tilelli. Yeɣli senjaq n usnaraf, yewwi abrid n trewla am netta am twaculit-is, yeɣba ur d iban anda yeffer. Win akken yenwan ad yeṣḍad yuɣal d netta I yettwaṣḍaden. Zzman i teddu s lqis.
Iɣmisen n ddunit meṛṛa gren tuttra yuzlen ɣef yal d acenfir: anda akka yeffer Kaddafi? Yal yiwen turda ( Hypothèse) s wacu i d-yegla, yal wa anda it –iccuk. Deg ujajiḥ n turdiwin- agi werdin yeffeɣed yissali yeswehemn acḥal d amdan: tawacult n Kaddafi
( kra seng-sen-t) yuɣ-iten lḥal di tmurt n Lẓẓayer. Seg yimir allen zin-t meṛṛa ɣer tmurt-a. Lexyuḍ yellan d uqiriṣen ger amezday aɣelnaw n leɛḍil n Libya( C.N.T) akked d udabu n Lẓẓayer yefka lmil ɣer tiɣersi ur nettwerqaɛ. Yal aserti seg yimir iruḥ s uzernen ( polémique) yenwa, akken ad yeffk tamuɣl-is ɣer tisertit n Lẓẓayer mgal tagawla n Libya. Yal yiwen amek i-iwalla tamselt , yal yiwen amek yecceg di targa n tikiti-s yeslifuyen I lekdeb akken ad yesgen tidet. Awwi-tt-id si Benjamen Stora ɣer Saɛid Saɛdi, seg uɣmis n le Figaro ɣer El waṭan, seg El Djazira ɣer l’ENTV. Yeqwa wawal….awal yeḥlulin di lqela n tebɣest!
Asktazal n liḥala, askasi yemdarkalen ɣef turdiwin yezin aɛrur i tilawt werḍin ad siwlent i tɣawsa s yisem-is, zzun akken leḥkem n tmurt n Lẓẓayer yella d leḥkem itt-yebnan ɣef tugdut akken ad yezdi di tisertit-is ɣer ugdud yesutren tugdut iyi-iman-is. Am akken qqaren is as yeqqar lemtal n uqbayli: “amzun yettak laẓ aɣṛum!” Win ur nelli ara d amagday amek ara ibud i wiyaḍ tugdut? Teḍra d kra am win akken yenwan anṣib deg yixmir, neɣ yesutren taččart deg ulac. S leḥseb neɣ s nniya men wala yetihi ɣef lqum s wawalen ur d nuggem deg aɣbalu n tidet. Imɣi n ṣṣeba maɛqul id nnan imewura, u nekni skkud nḥamel urar n tiddes s ilugan i-aɣ-d snulfuyen xas inni mazal neɣreq deg yir targit!
Ait Slimane Hamid