S yiwen uceṭṭiḍ imserreḥ i s teṣṣer ṣṣura-s ɣef usemmiḍ n wedrar ɛlayen akken ɛlayet tseṭṭa ur neshil i kennu. Aceṭṭiḍ ixellel s yebṛucen, yiwen di tama tayeffust, wayeḍ di tama tazelmaṭ nnig wul sdubbzen ideflawen. Teqqim ɣef wemnaṛ tettṛaju afrux imnejli ggunint txeftin yundin s iweryan, di ttnaṣfa n tebḥirin yessan s wedfel,cebḥent i tmuɣli, ṛzagit am ilili yessegrayen teṛzeg n wussan deg yimi n win t-id-yeccihwan. Ussan ttɛeddin taɛkemt tettaẓay i unerfud. Deg yimi ara yefrari wass d nettat tettgani amnaṛ amer ahat ad tbeddel fell-as. Siiiḥ ay iẓri, anef i ymeṭṭi ad yemmar d iẓeblac ɣef leḥnak yezzegzew usemmiḍ n tnessufin..ccfawat n wayen iɛeddan am wussan yelhan yettezɣuɣuden deg wul-is am teftilt n llamba yettbaḥaten di cwiṭ n zzit. Terfed tesres ur s-d-tufa ixef-is. Deg wemnaṛ ɣer daxel d lxiq d ubusemmaḍ, deg umnaṛ ɣer beṛṛa d ṛṛwaḥ war tuɣalin.. Mi d-yeɣli yiḍ ad d-tekcem s axxam, iɣimi nnig lkanun, lbenna n wulac, times yuɣen ur tezmir i ydeflawen , ur tezmir i yẓeblac, ur tezmir i ywaryan, tcuba times ugemmaḍ xas tuɣ deg uxxam…
Zira