Zedek Mulud gar yinaẓuren i yezgan refden taqbaylit s usefru d wawal ilqayanen. S umata, newwi-d yid-s awal, deg tdiwennit-a, ɣef yisiharen i t-yettraǧun deg useggas-a amaynut n 2019.
Aɣmis n Yimaziɣen : Yettraǧu-k-id usihar n ccna ass n 12 deg yennayer-a…
Zedek Mulud: Akka, i lmend n usfuggel n yennayer, ass n 12 yennayer 2019, ad iliɣ di Reims , deg usamar n Fransa. I tikkelt tamezwarut ara cnuɣ dinna. Syinna, ad iliɣ di Toulouse daɣen ass n 19 yennayer.
Nezmer ad d-nini yeshel ugar uheggi n tmeɣriwin di Fransa ?
Acu ara ak-iniɣ, di Fransa, meskud d yiwet n terbaɛt ukud qeddceɣ dima, d imẓawanen n dima daɣen, yeshel cwiṭ uheggi. Rnu-as tallelt n tddukkliwin i iqeddcen dinna.
Iban-d daɣen ad tiliḍ deg Zenith n Paris di 2020. Acimi i t-id-tberrḥeḍ si tura ?
Acku d Zenith-inu amezwaru. Rnu-as daɣ bɣiɣ ad fkeɣ akud i yiman-iw, i usuddes, i uzuzzer n yisalli akked yimdanen i yi-iḥemmlen akken yal yiwen ad as-ibin wahil-is si tura.
Aṭas-aya segmi tuklaleḍ Zenith, maca armi d tura i ak-d-ttwaldint tewwura-s. Llant kra n sebbat ?
Tura teẓriḍ d akken Zenith d tazeqqa d tameqqrant maḍi. Ccna dinna yessutur-d aṭas n wallalen, aṭas n tedrimt d waṭas n wakud. Nekk armi d tura i d-ufiɣ imheggi i iheggan ad yeddem taɛkemt d wayen i d-tessutur. Imi mačči menwala yezmer-as. Am wakken ilaq ad yili d win yesɛan taflest deg-k. Niqal berrḥeɣ-d ad geɣ Zenith deg 2019, a-t-an nwexxer-it i 2020.
Amek ɣef umaynut-ik i d-tenniḍ ad d-yeffeɣ di yunyu 2019, i ttraǧun s lḥir wid i ak-iḥemmlen ?
Ad yili d yiwen n walbum kan, ɣas lliɣ bɣiɣ ad d-suffɣeɣ sin ɣef tikkelt. Maca yewɛer-iyi cwiya, acku d ayen yesran i waṭas n wakud d ttawil. Ɣef waya, ferneɣ ad d-suffɣeɣ yiwen imed akken ilaq. Ad ɛerḍeɣ ad greɣ deg-s ugar n 13 n tezlatin, rnu ad d-nmuqel tigad ifazzen maḍi (taḍsa).
Dima di teẓrigin-ik Tamara ara d-yeffeɣ ?
Tikkelt-a, ad d-yeffeɣ s tallelt gar teẓrigin Tamara akked Rex Production.
Aṭas i yebɣan ad ẓren ma yefra wugur-nni i icudden ɣer uxxam n yizerfan n umeskar (ONDA) ?
Ih, tura yefra dayen. Ur ɣur-s aṭas-aya segmi yefra.
Awal ɣef tikkin-inek deg Tzabut tameqqrant d tajmilt i Nur At Ɛmara ?
Aqeddic-nni igerrez. Nur d amdakkel-iw, ssneɣ-t mi yella yedder, nemyussan, nezdi tidwilin… Ɣef waya, nwiɣ ad kkiɣ di tzabut-nni akken ad as-rreɣ tajmilt, ulamma d tigawt d tamecṭuḥt kan. Netta inuḍeḥ ɣef tutlayt, ɣef tira n tmaziɣt, nekni neqqar-as ayen tebɣiḍ yella ass-a. Ula d imekkiyen aṭas i d-yusan ass-nni. Yuklal ugar n wannect-a.
Yadra ad ilin yisiharen n ccna di Tmurt aseggas-a ?
Ssarameɣ ad tili deg useggas-a ara d-ikecmen yiwet n tmeɣra tameqqrant deg unnar Ukil Remḍan n Tizi Wezzu, deg wayyur n ɣuct. A-t-an fkiɣ-ak-d tazwart, imi urɛad i d-berrḥeɣ akk s wayagi.
Yesteqsa-t M. K.