Tramway, d yiwen n wallal n usiweḍ atrar i d-yennulfan di tmurt-nneɣ iseggasen-a ineggura, akken ad yili usishel n yinig n yimdanen gar umkan d wayeḍ daxel n temdint, maca, ar ass-a, mačči deg waṭas n waɣiren ideg yella. Wehran d yiwet gar twilayin i ikesben ttawil-a atrar seg useggas n 2011. Ileḥḥu ɣef teɣzi n 9 Km, seg tesdawit n Sanya, ad d-yezger tamdint tajdidt, talemmast n temdint, tasdawit n USTO, yettaweḍ alamma d iɣrem Ṣṣabaḥ.
Ur yewwiḍ ara ar wasunen yeggugen ɣef Wehran, am Beṭṭiwa, Msergin d Arzew. Ɣef waya, yella-d ussan-a usenfar n usewseɛ-is, d win ara yettawḍen alamma d tama n Arzew, segmi ara yettruḥu seg yiɣrem Ṣṣabaḥ. Lecɣal ar tura ssawḍen 50% ɛlaḥsab n Mass Mesṭafa Leḥmer, anemhal n useqdec n tramway, Sitram Wehran, yenna-d d akken bdan lecɣal kra n wayyuren ɣer deffir, yetturaǧu ad yekfu umahil deg umesḍis amezwaru n 2019, yeɛni send 21 yunyu i d-iteddun.
D ayen ara yeǧǧen iminigen ad sɛun afran, gar yifurguten, iṭaksiyen neɣ tramway seg yiɣrem Ṣṣabaḥ ɣer Arzew, ladɣa ma neẓra belli abrid yebɛed. Ma d ayen yerzan adellel, yenna-d ad ssugten tileṣṣaqin ɣef yisebdaden d lemriyat n tramwayat akken ad ḥṣun yimdanen s usenfar-a melmi ara yekfu. Ayagi akk akken ad ilin yiminigen deg liseɛ, ad ttafen iman-nsen mi ara ttinigen s ttawil-a n tramway. Acku deg useggas-a n 2019, yetturaǧu ad gerrzen lecɣal ugar, u ad yili uṣubbu n ssuma n wid yesɛan tikarḍiwin n uttikki.
K. A.