Mi ara d-yeqreb waggur n Remḍan, ṭṭuqutent tigawin n temsetla (lemɛawna) gar yimdanen. Dɣa di ddurt-agi kan iɛeddan, i d-iger Waggur azeggaɣ azzayri n tama n Ait Aissa Mimoun s tallelt n tddukkla tadelsant Imnar n Tdukli, yiwet n teɣri i yimezdaɣ n tɣiwant-agi i wakken ad jerden igerdan-nsen ara d-izeynen.Yebda ujerred ass-nni n lexmis, 25 deg waggur-agi n yebrir, yetturaǧu ad yessali ass n tsewwiqt n Remḍan, ara d-yilin ass n, 5 deg waggur n maggu 2019.
Yettili-d ujerred n yigerdan yenxeṣṣen, yenwan ad ḍehren aseggas-a, sɣur n Aggur azeggaɣ azzayri n Ait Aissa Mimoun, yellan deg taddart n Tahanouts. Yetturaǧu ad yili uzyen-nsen deg tɛecret taneggarut n waggur n Remḍan, imi mazal ur iban ara wazemz unṣib n ṭṭhara-agi. D imsuddsen n leqdic-agi ara d-yelhin s yigerdan-agi segmi ara tebdu temhalt-agi alamma tekfa. Bdu-tt-id s tuqqna n lḥenni d uselsi n yiselsa n umeḍhar alamma dayen ḍehren-d. Uqbel tamhalt-agi n ṭṭhara, yetturaǧu ad tili tfugla neɣ tmeɣra ɣef lmendad n yimedharen-agi. Yezmer lḥal ad tili uqbel ad zeynen s yiwwas neɣ s sin wussan kan. Ma d ahil n tmeɣra-a, ɣef wakken i t-id-nnan yimsuddsen-agi, ad yili d anesbaɣur i lfayda n twaculin n yimedharen-agi.
Gar ccna, taḍsa akked unecreḥ, tuqqna n lḥenni, tibuɣrain…atg.Ɣer taggara, ad d-nesmekti kan belli, imsuddsen-agi bdan ajmeɛ n yidrimen swayes ara qablen tamhalt-agi n ṭṭhara n yigerdan yenxeṣṣen. Am wakken daɣen i yetturaǧu ad ilin leqdicat-nniḍen sya ɣer sdat, gar sin-agi n yimsuddsen.
Ghani Amazigh