Tudert n wass-a temhaz, d tin yelḥan d wakud, simal ileḥḥu, simal ttnulfuyent-d tɣawsiwin, ttawint-d amaynut i umaḍal. Akken ula d aɣerbaz: simal ileḥḥu ɣer sdat, seg tallit ɣer tayeḍ, keccment-d tɣawsiwin timaynutin ara yesnernin aswir-is.
Acku d netta i d udem n tmurt: ma yella aɣerbaz ifaz, ula d tamurt akken ara tili; ma yella aɣerbaz, icudd-it wayen ur t-nessalay ara d asawen, ɣas ini-d tamurt-nni leqrar-is d aɣelluy. Aɣerbaz ur d-nessuffuɣ ara wid ara irefden tamurt-nsen, ulayɣer taɣuri. Ma neẓra d akken d wid i d-itteffɣen seg uɣerbaz ass-a, ara irefden tamurt azekka. Akken i yella deg yinzi “Leqraya tuklal leqder, tessuffuɣ-d imussnawen”. Tasenselkimt, d yiwen n wallal i d-yennulfan d amaynut, yettwaseqdac deg uɣerbaz, imi i as-yesra, acku aql-aɣ nettidir deg yiwet n tudert tatrart, tesra i usnulfu akken ara taẓ ɣer sdat.
Allal-a, yewwi-d yid-s aṭas n umaynut. Ih, d tidet, i wakken aɣerbaz ad yeddu d wakud, yewwi-d ad tili tsenselkimt gar trekkizin ara t-irefden acku aṭas n ubaɣur i tesɛa. Ur d-yeqqim ara kan uɣerbaz deg wallalen-nni n zik, d lawan i yettḥettimen fell-as akken ara yesseqdec tatiknulujit akked tsenselkimt. Inelmaden, ad ḍefren s sshala, ma d aselmad ad as-yishil uselmed. Ula d akud-nni i yettruḥun ɣef ulac deg tneɣrit, ma nesseqdec allalen-a imaynuten, ad yuɣal ad t-id-yerbeḥ uselmad. War ma nettu tugna yeṣfan, d ṣṣut yelhan, ara yeǧǧen wid yeqqaren ad ddun d temsirt s lferḥ. Ad yexdem uselmad asnas i temsirt s uselkim.
Amedya, ɣran aḍris ɣef yizem, ad sen-d-yessenɛet tugna n yizem. Neɣ tabidyut tamecṭuḥt ara d-yesbeggnen ayenni, akken ara gzun tamsirt-nni (aḍris) s telqay. Aṭas n ubaɣur i swayes tezmer ad d-teglu taɣult-a i uɣerbaz. Mi meqqrit yinelmaden, yal wa anida ara iruḥ, yal wa anida ara yeṭṭef abrid-is, wa ɣer tseddawit, wa ɣer tmura n berra, wa ad yeṭṭef kra n taɣult n lxedma, ad d-yaweḍ lawan i deg ara yeḥwiǧ tasenselkimt, ad t-yaɣ lḥal yessen yakan taɣult-a, ad as-ishilent temsal akken ad yexdem s wafud.
Ɣer taggara, ad d-nini kan, s unekcum n ttawil-a amaynut, atrar, ɣer uɣerbaz, iban-d umgarad gar zik d tura. Ass-a, ad d-teddmeḍ anelmad n uɣerbaz amenzu, ad t-tafeḍ yesselḥay akken iwata tasenselkimt. Annect-a yettuɣal d lfayda, ama i uɣerbaz, ama i tmetti neɣ i tmurt s umata. Acu kan, a win yufan, aseqdec n wallalen-a, ad yili i wayen yelhan. Ad yili d win ara d-yawin abaɣur d lfayda i tmetti d wid yettidiren deg-s.
Kh. A.