Akken tuɣ tannumi teseqqamut n taddart n At Zaim, s tallelt n d tddukkla tadelsant Tigejdit n At Zaim, tiddukkliwin tinaddalin n taddart d imezdaɣ n taddart s leqdicat-nsen idlesanen i yettilin d lmendad i useḥbiber ɣef wansayen d tgemmi taqbaylit, ad d-heggin asečči n Umɣit ara d-yilin deg wass n ssebt 17 seg waggur n ɣuct 2019 deg Umɣit n taddart n At Zεim, i ibeεden s wazal n 3 n yikulimitren ɣef tlemmast n tɣiwant n Mεatqa.
Tger-d Teseqqamut n taddart akked yimezdaɣ-is tiɣri i tnubga n yimdanen ɣer usečči-agi n Umɣit, i yimdanen n tudrin n tɣiwant n Mεatqa akked tudrin n tɣiwanin n lwilaya yemgaraden anda i asen-ttmennin tirza igerrzan. Yettuneḥsab Usečči n Umɣit gar wansayen iqburen i mazal ar ass-a deg tuget n tudrin n leqbayen, cudden agdud aqbayli d leqrun yezrin. Yettili-d Usečči n Umɣit yal aseggas. D tagnit n temlilit n tcemlit n yimezdaɣ n tudrin yemgaraden, deg usečči-agi i d-ttbanen wazalen n tegmat d tallelt gar yimdanen.
Ali Zalouk