Amur ameqqran n yimukan i yettusemman ɣef yisem n uɣewwaɣ Lwennas Meɛtub, di tmurt n Fransa i llan ar tura. Di tmurt n Lezzayer, neɣ di Tmurt n Yiqbayliyen abeɛda, armi d iseggasen-a ineggura i bdan yinesdabuyen idiganen d tddukkliwin ttsemmin imeḍqan ɣef Lwennas Meɛtub, neɣ sbaddaden isebdaden ɣef yiẓiɣer-is. Dɣa, tikkelt-a di twinest n Uqbu, yettwasbedd usebdad n Lwennas Meɛtub di temnaḍt n Genduza. Tella-d tfuggla-a s uḥḍar n taǧǧalt n ucennay, Massa Nadya Meɛtub, aselway n tɣiwant n Uqbu Mass Mulud Salḥi d kra n wudmawen n yidles. Ayen i yefkan i tegnit ccbaḥa d medden i d-yusan ad ilin di ttiɛad-a, ama n tama n Uqbu neɣ n saɣel.
Ulamma ixuss ayendin usneɣmes, imi drus i d-yessuffɣen isalli ɣef uneḍruy-a, wanag d imeyyaten i iḥeḍren i usali n usebdad-a s wudem unsib. Ɣef ssifa n usebdad-a, ad naf ixeddem azal n 50 n yisantimen, yettwasbedd ɣef teɛlayt n snat n lmitrat ahat si tmurt. Ugar n wudem n mmi-s n Tewrirt i d-yesmektay am acemma, nezmer ad nɣer deg-s kra n wawalen, am: « Ilul di, 24 yennayer 1956, di Tewrirt Musa, At Dwala. Yettwanɣa ass n, 25 yunyu 1998, deg Tala Bunan. Meɛtub Lwennas d acennay, d amẓawan, d ameskar-imsuddes, d amaway d amedyaz. Yella d ameɣnas n taluft n tmagit tamaziɣt. Yewwi-d timerna-s deg usuter n yidles amaziɣ, d umennuɣ i tugdut akked talakt (…)
Ulamma izerri zzman irennu segmi yemmut, simmal yettban-d wazal i yesɛa ɣur medden, am umeqqran am umecṭuḥ. Imi ayen akk iɣef yennuɣ di tudert-is, yeǧǧa-t ad yidir lebda ɣas ulac tafekka-s. « D ayen yelhan wayen akka yettmaggan d tiririt n wazal i unaẓur-nneɣ ameɣnas Lwennas Meɛtub di Tmurt-is. Nesḥassef imi ur d-yeffiɣ yisalli si tazwara ɣef usbedd n usebdad-a, wamma tili neḥḍer deg umkan », i d-yenna yiwen n ubabat i yeṭṭafaren Lwennas Meɛtub.
M. K.