Yettwassen wass n 16 yebrir di tmurt n Lezzayer, s wass n tmussni. Deg umezruy yettwarun, ass-n d ass n tmettant n Ben Badis, ayagi ssnen-t yizzayriyen akk ikecmen ɣer lakul, imi d ayen i asen-sḥeffḍen. Lameεna, deg yiwen n wass,16 di yebrir 1962, yemmut yiwen n umussnaw n tmurt n Yiqbayliyen, i yettwassnen di tmura n beṛṛa ugar n tmurt-is. Acku ar ass-a mazal ur as-fkin ara, ama i netta ama i twacult-is, azal-nsen idetti di tmurt-nsen anda i d-lulen. Wagi d Mass Lmuhub Ɛemṛuc, d yiwen i inejṛen abrid-is s tektiwin-is, yella d ameɣnas, d amaru, d amedyaz daɣen. Ilul Mass Ɛemṛuc di tɣiwant n Yiɣil Ɛli, yebda leqṛaya-ines di tmurt n Tunes, imi tawacult-is terza ɣer dinna. Mi yekfa leqṛaya-ines, yeffeɣ-d d aselmad n tsekla deg uɣerbaz n Sus di tmurt n Tunes. Seld aya, yessufeɣ-d isefra-ines imezwura deg useggas n 1934, d 1937. Am wakken i yexdem daɣen tidwilin tiseklanin deg umaṭṭaf s tutlayt taṛumit. Seg wayen i yura, ad d-nebder ullis » l’Éternel Jugurtha « , deg useggas n 1946. Ma yella d aɣmis, win n » 1928-1962 » i d-yettwassufɣen sɣur Tasaεdit Yasin. Am wakken i yesεa daɣen aṭas n yidlisen di tmedyezt. Leqdic-is mačči d ayen ad d-nawi deg umeslay n wass neɣ wayyur, imi yefka-d aṭas i tsekla tamaḍalant, d win iḥemmlen leqdic, d amnadi, d win iḥemmlen tamussni. Yemmut di Paris, ass n 19 meɣṛes 1962, lameεna yeǧǧa-d agerruj n tmussni, swayes ara yedder i lebda.
K. K.