Ass-nni n ssebt, 17 ɣuct 2019, i tebda s wudem unṣib tezrigt tamezwarut n rreḥba n lfeṭṭa n Ath Yenni, ara yeddun ɣef teɣzi n ddurt, ad tfak ass n lexmis, 22 ɣuct 2019. Aṭas n yiḥeddaden n lefṭṭa i d-yerran i teɣri n Tddukkla n Yiḥeddaden n lfeṭṭa n At Yanni, i d-yesuddsen rreḥb-agi deg tezrigt-is tamezwaeut.
“Takatut d tnekkit” d wagi i d asentel n rreḥba-agi, i d-ijemɛen azal n 80 n yinḍan i d-yewwin lfeṭṭa n At Yanni, ɣer tama daɣen yiḥeddaden i d-yewwin lfeṭṭa n tamiwin-nnḍen n tmurt n Leqbayel. Maca, iswi-nsen d yiwen, ad d-seknen i medden, di rreḥba-agi, ayen heggan ɣef teɣzi n useggas. Ma d iswi agejdan n yimsuddsen n leqdic-a, d asnerni d useḥbiber ɣef ugerruj-agi,d tririt n tmuɣli n wid teɛna temsalt ɣer yinaẓuren-agi yenḥafen aṭs, ladɣa ɣef tenga tamezwarut (la matière premiére).
Ma ɣef tegnatin ideg ttidiren yinḍan-agi, yekfa-tent-id akk yiwen uḥeddad i nufa dinna s wawal-a: “Nenṭer mačči d izli, yerna am win iceṭṭḥen i uderɣal”. Tettuneḥsab tmeɣra-agi daɣen d tagnit i yinḍan d yimsuddsen n leqdic-agi, i wakken ad ssutren deg wid terza temsalt-a, yecban aɣlif n tmerrit akked yirmad iqburen, akken ad d-lhun s yiɣilifen i d-ttmagaren yiḥeddaden-agi. Ulamma yella lexṣaṣ deg lfeṭṭa akked yisufar imezwura i sexdamen yinḍan-agi d leɣla-nsen di ssuq n berra, maca mazal ttkemmilen axeddim.
Ɣer taggara, ad d-nesmekti belli mazal ttiɛad-agi la yettkemmil deg Uxxam n yilmeẓyen Ali Kedache n tɣiwant n At Yanni, alamma d ass n lexmis, 22 ɣuct 2019. Asiher-agi, d ttiɛad adelsan imi i d-yettili deg-s leqdic anesbaɣur. D armud adamsan daɣen, imi yettak tagnit i yinḍan (artisans) i wakken ad senzen sselɛa-nsen. Am wakken i d-ttilin leqdicat-nniḍen.
Gh. A.