Akken tella tarrayt tamirant n tudert, tban-d am wakken ur yeddi yid-s umdan, yeɣli-d akk seg-s, abeɛda di Tmurt n leqbayel, imi fell-as ara d-nawi awal. Tezleg n uwanek d usames n tesreṭ, rebban-d aɣerman iwumi ɛerqen yiberdan, armi ur tbedd tidet, ur tbedd teɣdemt, ur ibedd yidles. Seg wakken yella-d uttɛeddi d ageɛmir ɣef usaḍuf n tudert seg wacḥal d aseggas tura, yeggra-d uḍebber deg tesga, yir rray di tlemmast. Armi tbessel tettahda tmetti, acku ur tesɛi ilugan n tudert, ur tufi imrebbi wala d imwelleh ara d-yesseknen sswab d lɛali.
Ahat yerza waya amaḍal merra, imi seg wakken yettwakkes wazal i uqerru, yal amdan iẓerr iman-is d aqerru n yiman-is, yal amdan iẓerr iman-is d imegzi ugar n wayeḍ, ɣas mačči akken i tella; imdanen d isenfan, tigzi d iswiren. Seg waya, teɛreq tmetti deg ubrid, tesnulfay-d iɣilifen iwumi ur tezmir. Yuɣal, gar yimdanen, ur iban win yesɛan tiktiwin ɣef win ur tent-nesɛi. Ula d amennuɣ yezga yejhed di tmetti acku aqerru ara yefrun timsal ulac-it. Neɣ dɣa, ayen i yeṭṭfen amḍiq n uqerru-a, d ayen ur nelli d abrid, neɣ deg teklalit.
Nwala iseggasen-a ineggura ayen tuɣ i d-yettrasen d tilufa i tlemmast n tejmaɛt, qqiment tura kan di texxamt, neɣ ɣur tmeṭṭut kan. Ama yelha rray neɣ diri-t, neḥder i waṭas n tegnatin ideg bḍant teslatin atmaten, tikwal ula ɣef temsal i yerzan abaɣur n taddart s umata. S tejmaɛt n taddart, d yirgazen akk at sswab d lhiba i tt-iɛemren, yella di tmetti leqder, tella lḥerma, i iruḥen deg wakud-a amiran ideg nettidir. Aredmani, lmizan n tudert tuɣ ur as-iruḥ i tmetti akken yella lḥal tura, yal aɛeggal amek yesderfif, yal yiwen amek yesdurɣul war ma iban-as-d ubrid. Si tama tayeḍ, nwala amek i dḥettment kra n tamiwin isuḍaf iwerdanen ɣur Yiqbayliyen segmi ɣabent tuget n tjemmuyaɛ deg tudrin d tuddar, terna teɣba Leɛnaya-nsen.
Nettwali di Tmurt Taqbaylit amek ttruḥun wansayen-is, rennun wazalen-is, ɣef yisem n wansay awerdan neɣ n tesreṭ. Segmi tekkes tuddsa n tmetti, i tuɣ tella s tejmaɛt, yexreb kullec di tal taddart. Akken ad d-yuɣal wayen iɛerqen, ad terked taddart amacemma, yessefk ad d-tuɣal tejmaɛt ara yesselḥayen tilufa, ara yettqeɛɛiden ussan, ara yilin d leɛnaya.
M. K.