Mettiǧi d yiwet n taddart i yettabaεen ɣer tɣiwant n Uqbu. Akken i aɣ-d-nnan, zgan yimezdaɣ-is d acekti seg waddad n taddart-nsen. Imi ur ttwaxedmen yiberdan-is, ur ksiben ttawilat n tudert yelhan. S unamek-nniḍen, ula d aman xuṣṣen nezzeh ɣuṛ-sen. Rnu ɣer waya, ula d trisiti, llan imeḍqan ur tt-sεin ara. Γef leḥsab n teɣbalut-nneɣ, tuɣal temnaḍt-a di rrif, ulac win i d-yedhan yid-s. D ayen i yeǧǧan imezdaɣ-is msefhamen gar-asen, syin ffɣen-d s rray d akken ilaq ad d-afen tifrat s uɣiwel i uɣbel-a. Acku addad n temnaḍt-nsen ur yeṣṣefṛaḥ ara. Daymi i d-ffɣen kra n warraw n taddart, bellεen Axxam n tɣiwant n Uqbu ass n arim, 16 di ctembeṛ yezrin.
Ad d-nesmekti d akken aɣbel-a ur yelli d amaynut, lameεna acḥal-ayagi nutni ttcektin, ssuturen deg yimḍebbṛen n tɣiwant, ad d-afen tifrat i iwulmen. Meεna ineggura-a, sεuzzgen imezzuɣen-nsen, ɣef wakken i t-id-wekkden wat taddart. Γef waya, ihi, i bellεen Axxam n tɣiwant, alamma rran-d yimḍebbṛen-is xeṛsum i kra n wayen ssuturen. Ula d madden, sbeɣsen-ten ɣef wayen i xedmen, ayagi imi ruḥen srid ɣer tɣiwant bellεen-tt, mačči am wiyaḍ i yettazalen i ubellaε n yeberdan, mebla ma sḥesben i yigemmaḍ.
K.K