Ɣef wakken i t-id-iwekked ass-nni n lǧemɛa iɛeddan uselway n Teseqqamut tilellit n tɛessast n tefranin, Charfi, d Abdelmadjid Tebboune i d-yufraren deg tefranin n tselwayt i yeḍran ass-nni n lexmis, 12 deg duǧember 2019. Mbeɛd imi ttwawexrent tefranin n tselwayt i snat n tikkal deg yebrir akked yulyu yezrin, s ssebba n tmesbaniyin i d-yettilin deg Lezzayer seg 16 deg yebrir ar ass-a, ha-t-an ḍrant-d ihi tefranin n tselwayt ass-nni n, 12 deg waggur deg-i nella, i yesbedden aselway wis 8 n Tegduda Tazzayrit.
Ɣef leḥsab n yigemmaḍ i d-tefka Teseqqamut tilellit, d Abdelmadjid Tebboune i yellan d amezwaru s 58, 15 % deg tefranin-agi. Deffir-s Bengrina s 17, 38 %, wis tlata d Ali Benflis s 10, 55 %, syin d Azzedine Mihoubi s 7, 26 %. Ma d aneggaru d Abdelaziz Belaid s 6, 66%. Yewweḍ ugemmuḍ n wid yekkan deg tefranin ɣer 39, 83 %, dima ɣef leḥsab n Teseqqamut tilellit n tɛessast n tefranin n tselwayt. Xas dayen iban-d d akken d Abdelmadjid Tebboune i d aselway n Lezzayer, acu kan mazal ad d-tini s wudem unṣib Teseqqamut tamendawit deg wussan i d-iteddun anda ara d-tefk igemmaḍ unṣiben.
Ad d-nesmekti kan aɣunzu n tefranin-agi sɣur Tizi Uzzu akked Bgayet, imi sɛant deg-sent s ddaw n 1 %. Ilul Abdelmadjid Tebboune ass n, 17 deg unbir 1945 deg Mechria, lwilaya n Naâma. Aṭas n yiseggasen i yesɛedda deg tedbelt akked udabu. Am wakken iɛedda diɣ d lwali n Tizi Uzzu seg 1989 ar 1991. Ɣef wakken i d-yenna, dɣa, «Cedhaɣ ad rzuɣ ɣer temdinin n tmurt n leqbayel, Tizi Uzzu akked Bgayet».
Hocine Moula