Ma yella teggra-d tmurt gar yifassen n yilmeẓyen, ad as-ṣeggmen wussan. D tagi i d tamuɣli n umur ameqqran n yimesbaniyen n umussu-agi aɣerfan. Ddurt iɛeddan, imi kulec yemdel di temnadt n Freḥa , heggan-d yilmeẓyen yiwet n twizi , anda i sizedgen iberdan n temdint-nsen: Kksen iḍumman i yellan. Xeddmen afus deg ufus akken ad fken udem icebḥen i temnaḍt-agi .Ula d imezdaɣ n temdint n Tizi Ɣennif, ddan deg ubrid-agi. Nnejmaɛen akken ad sizdgen tamdint-nsen. Yal yiwen s wayes i d-iɛawen: Wa s wallalen n usizdeg, wayeḍ s usečči n yiwiziwen. Am wakken daɣen i ten-ɛawnen yiɣallen n usellek n temdint akked tɣiwant n Tizi Ɣennif i d-yefkan kra n wayen ḥwaǧen deg twizi-agi . Akka i d udem n tmurt n leqbayel, akka i d tt-id-ǧǧan yimezwura, akka i d udem i d as-fkan yilmeẓyen n wass-a, i iḍeffren tugna-nni n twizi i d-yettilin di tudrin n leqbayel n zik. D ayen i yettkemmilen lḥir i wul akken tamurt, ad teggri gar yifassen n yilmeẓyen-agi .
Yamani Souhila