Accueil Tamazight Ɛeṭṭlen lecɣal n ubrid

Ɛecba

Ɛeṭṭlen lecɣal n ubrid

21

Qqaren si zik « Ɣuṛ-k ɣuṛ-i ». Meḥsub akken ad teddu tɣawsa akken ilaq, yelha ad tili nneyya tembaddal si snat n tamiwin. D ayen i yeḍṛan deg usenfaṛ n lecɣal i d-yettilin deg ubrid n Ɛecba n Xeṛṛaṭa anida tɣab nneyya yeṣfan, taggara-agi. Dɣa, di lecɣal-agi aṭas n yixeddamen i iḥebsen ɣef ssebba n lexlaṣ i iɛeṭṭlen ad d-yas si tama n yimasayen n usenfaṛ. Akken i aɣ-d-nnan wid ixeddmen dinna, ḥebsen lxedma acku ur ttwaxellṣen ara seg waṭas-aya.

Dɣa, imi aṭas n tkebbaniyin i yellan deg usenfaṛ-a, yal yiwet telha-d s walbaɛḍ n yiḥricen, llant tigad iḥebsen ixeddim s lqella n ttawil n tedrimt swayes ara d-aɣent sselɛa, neɣ ad xellsent iqeddacen-nsen. «Ur nezmir ara ad nkemmel axeddim akken tella teswiɛt lawan-agi. D ugur n tedrimt kan i d ssebba. Ur nezmir ara ad nekker i ccɣel s wazal n 700 melyun, ad nettraǧu lexlaṣ ulac, ad neqqim akken baḥ! », yenna-aɣ-d akka bab n yiwet n tkebbanit tameẓyant i yeṭṭfen aḥric deg usenfaṛ n Ɛecba.

Ad d-nesmekti d akken tikebbunay tigejdanin i yeṭṭfen asenfar meṛṛa-is, tella tin n ṭṭurk akked tayed i yettabaɛen Heddad. Seg wuguren akk i icudden ɣer tedrimt, ṛuḥent tkebbaniyin armi sḥebsent amḍan d ameqqṛan n yixeddamen. Dɣa, drus i mazal n yixeddamen imir-a qeddcen deg unnar. «Aṭas n yimeddukkal n uxeddim i sḥebsen yid-i. Nekkini nnan-iyi-d ad am-d-nefk lunji war lexlaṣ, alamma nuɣal nessawel-am-d. Aql-i tura ttraǧuɣ», i aɣ-d-tenna yiwet n tlemẓit. Yesbeggin-d wayagi dɣa acḥal meqqer uɣilif d tezɣent deg usenfar-a n usewseɛ d uṣeggem n ubrid n Ɛecba.
K. K.