Accueil Tamazight Ɛewwlen yimsenza d imnayen ad uɣalen s axeddim

Bgayet

Ɛewwlen yimsenza d imnayen ad uɣalen s axeddim

64

Azal n kraḍ n wayyuren segmi i tebda teswiεt-agi n ukman. Deg wayyuren imezwura, ulac win icektan. Γas llan wid iwumi ur yehwi ara waddad-a, meεna yewwi-d fell-asen ad qaddren ayen i d-yeqqar usaḍuf. Ma yella deg ussan-a ineggura, beddlen medden tamuɣli, uɣalen ttxemmimen akken-nniḍen. Dɣa, εewwlen ad ṛẓen akman, ad uɣalen ɣer tudert-nsen n yal ass. D tidet, aṭṭan mazal-it d amahi ɣef ugdud, beṣṣeḥ taswiεt i ttidiren yimdanen, teǧǧa-ten ttun lhem n lehlak, ttxemmimem ɣef iɣeblen n tudert i ten-id-imuggren. Seg yiwet n tama, ur nwan ara ad tεeṭṭel twaɣit-a, ad ten-teḥbes ɣef uxeddim-nsen. Seg tama-tayeḍ, ufan-d iman-nsen mebla amsaεef, imi ddula ur tbedd ara s idis-nsen. Ihi llan ttidiren tugdi n waṭṭan kan, tura uɣalen ttidiren taneggarut-a akked tin n yimal n twaculin-nsen, d tmuddurt-nsent. Meḥsub, nḍeṛṛen nezzeh yimḍebbṛen n twaculin, acku ugar n sin n wayyuren nutni mebla taɣbalut n usuṛdi. D ayen i yeǧǧan imsenza akked imnayen n twilayt n Bgayet, ffɣen-d ussan yezrin xedmen inejmuεen. Anda i ssuturen ttesriḥ i wakken ad uɣalen ɣer uxeddim-nsen. Ad d-nesmekti d akken mačči di Bgayet i d-yella waya, meεna ula di kra n twilayin-nniḍen. Axaṭeṛ ɣef leḥsab-nsen, akman-agi, mačči d ayen yeffɣen fell-asen. Mebla ma nettu wid yellan yakan ur xeddmen ara, neɣ d ixeddamen n wass. Ineggura-a dɣa, d nutni i tḥuza teswiεt ugar. Γef usentel-a, yenna-aɣ-d yiwen n ubabat: « Temcubbek akken ur tferru, nekni ur nqebbel tigi. Ihi win i tt-yeqqnen, ilaq-as ad tt-yefru. Di tmura n umaḍal s umata, bedden s idis n ugdud-nsen, ṣṣawaḍen-asen ayen ḥwaǧen ɣer yixxamen. Rnu i waya, kullec yexles, ama d aman, neɣ d trisiti. Ma yella di tmurt-nneɣ, sseḥseb i yiman-ik. Ihi ula d nekni, ur nettsusum ara, ḥacama i aɣ-d-ufan tifrat iwulmen». Ad d-nesmekti kan, d akken iḍelli, 7/6/2020, i yebda uḥric amezwaru n tukksa n ukman ɣef kra yimahilen, syin ad yekkes s umata seg 14 deg yunyu d tasawent.
K. K.