Accueil Tamazight Ḍaɛen kraḍ n yilemẓiyen di teẓgi

Adrar n Fad

Ḍaɛen kraḍ n yilemẓiyen di teẓgi

70

Ass n 2 yennayer iɛeddan, mettwal 20:00 n tmeddit, raɛen (ḍaɛen) ttlata n yilemẓiyen deg teẓgi n Udrar n Fad, ɣer tama n taddart n Yiɣil Wulli. Akken i d-tewwi teɣbalut-nneɣ, i icudden i Uḥuddu aɣarim n waɣir n Bgayet, tecqa-ten yilemẓiyen-a s adrar tirza n uḥewwes i gan ass-nni, rnu usan-d seg tɣiwant tanaragt n Tsexriwt. Seld mi yettwaberreḥ uriɛ-nsen, iceggeɛ Uḥuddu aɣarim akk irgazen d wallalen ilaqen i beddu n unadi di tmiṭ n teẓgi-nni ɣef yilemẓiyen-a i yesɛan gar 18 d 19 n yiseggasen. Yewwi-d ad d-nesmekti d akken ula inesdabuyen idiganen (autorités locales), ijadarmiyen akked yiɣermanen, kkin daɣen deg temhelt-a n unadi, i yebdan akken-nni mi d-yeɣli yiḍ s ddeqs n wakud, armi teḥbes ɣer leǧwahi n 22:30. Seld mi asen-sutren yirgazen n usellek, saɣen yilemẓiyen-a times deg usɣar anda akken llan, syinna d abbu i asen-yerran tifin sehlent i wid yettnadin. Ɣer taggara, ttwawfen ihi warrac-a war ma yuɣ-iten kra di tfekka neɣ di tnefsit-nsen. D acu, yessufeɣ-d awellih Uḥuddu aɣarim i yilemẓiyen s umata, ad sneqsen tuffɣiwin s idurar di tallit-a n usemmiḍ d yigeffuren, ideg ttiwɛiren yiberdan i tikli, yetteɣlay-d yiḍ zik, atg.

M. K.