Accueil Tamazight Ḥedru-d d Zénith amezwaru n Zedek

Fransa

Ḥedru-d d Zénith amezwaru n Zedek

259

Ulamma aṭas-aya segmi ssarmen yimḥemmalen-is ad walin anaẓur-nsen deg Zénith n Paris, acu kan armi d taggara-a i d-yettwaberreḥ s usihar n tegnit i ttraǧun.

Ass n, 12 yennayer 2020, ara yemlil ihi Zedek Mulud akked wid i t-yeṭṭafaren, deg tzeqqa tameqqrant n Zénith n Paris. I lmend n waya, aṭas i d-yuɣen yakan itikiyen n ukcam, imi isalli-a n Zénith amezwaru n mmi-s n At Xelfun, yeffeɣ-d send ad d-yekcem useggas-a n 2019. D lebɣi n yimheggiyen d unaẓur s timmad-is, akken si tama, ad fken akud i yimdanen i yebɣan ad ḥerzen imeḍqan, si tayeḍ, ad d-yili uheggi iwulmen sɣur-sen.

Ad d-nesmekti d akken tuɣ yetturaǧu Zénith amezwaru n bab n « Tidderwect-is » i yennayer 2019, maca ur d-yeḍri ara. Ɣef waya yenna-aɣ-d Zedek Mulud: «D tidet, niqal ad geɣ Zénith deg yennayer 2019, maca ur llint ara tegnatin i iwulmen akken ilaq, dɣa nwexxer-it i yennayer 2020».

Deg Zénith-a i d-iteddun, ugar n usfuggel n yennayer 2970, ad yesfuggel Zedek Mulud lwaḥi d yimḥemmalen-is ula d amulli-s wis 37 segmi yebda amecwar-is n ccna, d usnerni n yisefra d tezlatin. Tura akka ttnuzun yitikiyen deg waṭas n tḥuna i yettwassnen s waya, akked internet.

D timlilit i ur ilaq ad ibeṭṭel yal Aqbayli i yesseḥbibiren ɣef teqbaylit-is, imi Zedek Mulud gar yinaẓuren yuqan i d-yesbeggnen ɛinani seg waṭas-aya addud-is ɣef wayen yerzan taqbaylit, idles d tutlayt. Ula d tizlit tamḥaddit yeddem-itt s wudem yelhan armi llan wid i as-yessawalen « Meɛtub wis sin ». Yuɣ lḥal, ad d-yili ussan-a umaynut si tama n Zedek Mulud, imi tuffɣa n walbum-is yewwi-d ad d-teḍru deg wayyur-a n yunyu neɣ deg yulyu.
M. K.