Wwḍen tura 28 n yiseggasen n unaḍeḥ, n timmeɣnest, snat n tmerwin d ṭam n uselmed, aseḥbiber d usekfel n tutlayt tayemmat, tutlayt n tmaziɣt. Deg tlemmast n tmetti timseɛrebt, deg yiwet n tallit ideg yettwagdel umeslay, yettwaṭṭaf kra n win ara d-yinin awal s teqbaylit, deg tlemmast n tewtilin-a i iweɛren, i d-tennulfa yiwet n tddukkla tamaziɣt, di temdint n Wehran. Tlul-d tddukkla-a i yewwin isem n Numidya. Tiddukkla Numidya, tella yakan uqbel ad d-tlal s wudem unṣib, d tin ara yuɣalen yis-neɣ ar tazwara n yiseggasen n 1980, anida i tebda leqdic s tuffra, sɣur kra n urbaɛ inebɣasen. Armi i d-tella tullya tasertant i d-yeglan s tikci n ttesriḥ i usnulfu n tddukkliwin, dɣa tella-d tddukkla Numidya seg tmezwura i yessutren akken ad tili, ɣas akken yella-d maḥyaf mgal-is, imi ur as-yettunefk ara ttesriḥ armi i iɛedda useggas segmi tessers akaram-is deg uxxam n twilayt, ɣef lǧal n wawal Tamazight i d-yeddan deg yisuḍaf-is n daxel. Seg wass-nni ar ass-a, seg wass n umenzu n tuber 1991, urǧin teḥbis anaḍeḥ, urǧin teḥbis leqdic adelsan amatu, urǧin teḥbis asuter d uselmed n tmaziɣt. Ddeqs n leqdicat i d-tettheggi ɣef teɣzi n useggas, maca ɣur-s kraḍ n ttiɛadat igejdanen deg useggas ur ten-tzeggel ara, dima llan gar yimuhal-is. Leqdicat-a, rzan Tafaska n yennayer, Tafsut n Yimaziɣen, Ass n tmenɣiwt n Lwennas Meɛtub. Tezger-d lesnin-agi tddukkla Numidya s tebɣest n yiɛeggalen-is : gar-asen aselway Mass S. Zeɛmuc i yellan i lmendad-is segmi d-tlul ar ass-a. Am wakken daɣen i llan ddeqs n wid yemmuten, seg wid i iqedcen deg-s, nessawaḍ-asen talwit. Qlilit tddukkliwin i yeddren ugar n 20 n yiseggasen akken ad ṭṭfent tinnuzbit, maca Tiddukkla Tadelsant Numidya, s lebɣi d tebɣest, tessaweḍ ass-a ɣer 28 n yiseggasen di leɛmer-is. Nessaram-as ugar n tudert, ugar n leqdic d wugar n umhaz.
Khaled Achoui