Mi ara ṭṭlam yesseblaɛ tafat s yissiḍ d uslifeẓ n tcurkeḍt, ad nḥeddeṛ s terẓeg i uleqqem imciṭen n tmagit tagimseggast, syin amyi yettuɣal d tilawt. Imcumen-agi, tteḥqaren-aɣ yal taswiɛt. Nugi ad neknu. Aleqqem yugi ad yaɣ segmi iɛuraf zik ittṭerḍiqen s urured n tezmert n tudert yettwaxnaqen. Ur nesteɛfuy alamma nedder d yiman-nneɣ u ḥebsen yimarawen-nneɣ aneqleb deg yiẓẓekwan-nsen. Tibawt, tessefqaɛ-aɣ armi i d-tegla-d s lmut. Tinififtin n ẓẓif-nneɣ, ttwamerrtent. Meɛtub Lwennas, tcennuḍ s ubeɛzeq ayen ḥulfan watmaten-ik s tuffra. D tiɣtas ay nella n unagraw anda tilelli tesɛa anamek n uzref i kra ad melken wiyaḍ. Kečč d aselɣar i wul yettwarzen. D anza yeddren n lebɣi-nneɣ iwakken ad nezg nbedd. Ccna yekka-d seg ẓẓif-inek, taɣuct-ik i icuffen s zzɛaf d wurfan teseḥmay-aɣ iɣsan. Nettxayal Tawes Amruc d umeṭṭraḍ anumidi mi tzegger igenwan n tmurt-nneɣ. Syin akin ticraḍ n tyemmatin-nneɣ, ttuɣalent d tidet tamagdezt. Ulac ayen-nniḍen yessnen neɣ izemren ad aɣ-yenher. Lwennas, tesmektiḍ-aɣ-d s tumert belli ɣas uzlen yidammen, aẓar yettwaxlaf. Ulac alugen n ugama yugaren wagi. Aḥwaṣ n tlelli-nneɣ sɣur yimesḥaf-agi i aɣ-iḥekmen, yerra aɣref-nneɣ amzun d taqeḍɛit n lmal yuḍnen anda wid ifazen ɛeṛqen, ussafen neɣ ttwarnan, wid menwala uɣen taggamaḍt n yitran yettcririqen. Rru ay ul. Ccnu-asen a Lwennas belli tugdut d aram amezwaru deg yimawen-nneɣ, neṭṭeḍ-itt-id seg yidmaren n tyemmatin-nneɣ. Ccnu-asen fad-nneɣ n teɣdemt d uɣram. Ccnu, a Lwennas, ccnu ! Ɛni amedyaz yezmer ad yemet ?
D tasuqilt n Yuba Tala