Mbaɛd acḥal d aseggas n sbar ɣef yir addad n tudert n yimezdaɣ n tɣiwanin n unẓul n ugezdu n Tizi Uzzu, ladɣa, taɣiwant n At Yeḥya Mussa, i ibeɛden s wazal n 30 n yikulimitren ɣef tlemmast n ugezdu, ffɣen-d yimezdaɣ seg tsussmi-nsen, ass-nni n lḥed, 25 seg waggur n ɣuct 2019, u bddan s tigawin n usuter n uwenneɛ n waddad n tudert. D imezdaɣ n tudrin n Hellil d Tifwa, i d-iheggan tigawin-agi n usuter, anda ɣelqen deg tazwara n ddurt iɛeddan abrid aɣelnaw wis 25 yettawin ɣer tlemmast n ugezdu n Tizi Uzzu.
Aya i wakken ad d-beggnen lɣiḍ-nsen s waddad n tudert ideg ttidiren yimezdaɣ-a, u ad d-sutren awenneɛ deg waddad-agi. Ssuturen diɣ ajerred n wahil n unegmu n temḍiqt-agi yenḥafen s waṭas ma nessemres-itt akked temnaḍt-nniḍen. Ihi, seld asɛuẓẓeg n temẓẓuɣt yimḍebbren teɛna temsalt, ɣelqen yimezdaɣ n snat n tudrin Axxam n tɣiwant n At Yeḥya Mussa, ass-nni n tlata iɛeddan, 27 seg waggur n ɣuct 2019. Gar wayen ssuturen yimezdaɣ n tudrin-agi, deg tazwara aqɛed n yiberdan n tɣiwant i yellan deg yir addad, ladɣa akemmel n yisenfaren n uxeddim n yiberdan i icudden snat n tudrin ɣef wazal n 6.8 n yikulimitren, yebdan yakan deg useggas n 2017.
Rnu ɣef waya, ṭṭalaben daɣen awenneɛ n waddad n tudert n yimdanen, d ukemmel n yisenfaren i yebdan acḥal-ayagi d aseggas, ajerred n wahil iwatan n unegmu i tɣiwant-agi, yenḥafen deg yal aḥric n tudert.
Ali Zalouk