Deg yiwen n yisalli i d-tessuffeɣ Tuddsa tagraɣlant i uḥraz n ugama, yedda-d kra n umḍan n yiɣersiwen, n umenẓaw n Tferka (Tafriqt) abeɛda, i yellan ɣef yimi n nnger. Nezmer ad d-nebder seg yiɣersiwen-a Izem, Ilu, Aḍebɛiw, Aɣerwaṭ (arinusirus), amdeɣ (girafe) d wuccen n lexla. I tifrat n kra seg wugur-a, txelles Teseqqamut Turufant yiwen n wahil, s wazal n 12 n yimelyan iyuruten, ara yeǧǧen imezdaɣ idiganen ad zdin tamnaḍt n tudert akked yiɣersiwen imehhazen (prédateurs) war ma yenṭer yiwen seg-sen.
Deg wahil-a, ara yettwaselḥun sɣur SOS, ad naf iswi amenzu d aseḥbes ulamma cwiṭ n tmettant n yizmawen, iɣilasen, iḍebɛiwen, iḍan n lexla d wuccanen ityupyanen, i simmal ttenṭerrayen seg useyyed berra i usaḍuf, annerni n tnezduɣin d ukcam n yimdanen di tẓegwa. S tedrimt-a n Teseqqamut turufant, yezmer ad d-yawi kra n ubaɣur usenfar-a n uḥraz iwumi fkan azwel SOS Tiẓgi taferkant. Ula d tiɣri i usumer n walbaɛḍ n yisenfaren-nniḍen, tettwaceyyeɛ i kra n tuddsiwin n tmetti tadigant. Dɣa, iberreḥ-d s tumert-is unmazul n unemhal n wahil n Tuddsa tagraɣlant i uḥraz n ugama, seld tallelt-a s tedrimt n Teseqqamut turufant.
Yenna-d daɣen yesɛa ayendin d azal wahil-a, meskud ad yallel aɣersiw ad yesnerni azbu-is, ad d-yesnulfu i yiman-is tabaɣurt s wayen i as-d-yefka yakan ugama-is. Ɣef wawal-is, ad yekki daɣ wahil-a deg uḥraz d usellek n kra n yiɣersiwen imehhazen n Tferka i iteddun ad negren, am nutni am yiɣersiwen igemrawen (proie). Akkin i usenfar-a, yewwi-d ad d-nesmekti d akken, ɣas ma tikwal yesmurrus wahil n uḥraz i d-yettwaskarayen deg Tferka, mazal nnger yeṭṭafar ddeqs n yisenfan n yiɣersiwen, armi drus i d-yeqqimen seg-sen. Amedya n yizem (Panthera leo) i yellan deg wumuɣ aẓewwaɣ deg umaḍal merra, akken i d-tewwi tuddsa-a tagraɣlant i uḥraz n ugama.
M. K.