Iselmaden n tmaziɣt n Tubiret begnen-d lɣiḍ nsen ass n ttlata yezrin, imi xedmen yiwen n yibeddi sdat n tmehla n usedwel n twilayt. Tasebḥit n wass, myagaren-d imeṛṛa iwakken ad ssiwḍen i yimḍebber amezwaru n usegmi n Tubiret iɣeblan ideg yettidir uselmed n tmaziɣt. Mbeɛd yiwet n dqiqa n tsusmi ɣef ṛṛuḥ n NurAt Ɛmara, yiwen seg yiselmaden n tmaziɣt yewwḍen leɛfu n Rebbi ussan-a iɛeddan, tella-d tɣuri n tiɣerɣert n yicektayen. Nnig n mraw n tneqqiḍin i yettwajerden, tamezwarut deg-sent d tin yerzan udem n uselmed i ilaqen ad yili mačči s lxetyar. Dɣa d wa i d aɛewwiq ameqran i yebdan yessehzal aselmed n tamaziɣt labeɛda di temdint n Tubiret.
Am wakken ara naf daɣ ayen icudden ɣer uheggi n yimekwan n lxedma, imi ulamma yettnerni umḍan n yiselmaden maca yebɛed s waṭas ɣef wayen i tettraju tmetti. Aqader n yisuḍaf n tneɣlaft n usegmi d aḥric ijebden lwelha n yiselmaden n tmaziɣt i yettwalin dakken aṭas n yinemhalen n yiɣerbazen ur ttqadaren ara iwellihen-a. Ɣeh leḥsab n wayen i d-nnan, tamaziɣt d tin i yettaṭṭafen amur aneggaru deg uɣerbaz, tikwal ur tettawi ara azal-is n tlata n tsaɛtin i yimalas. Yal anemhal ixeddem akken i yebɣa ! Aṭas n yiɣeblan i dbedren yiselmaden, d ayen i ten-yeǧǧan ur zmiren ara ad ṣebren i lḥif i ttidiren deg yiɣerbazen nsen d wayen i yettrajun tamaziɣt.
Imi imḍebber amezwaru n tmehla n usegmi ur yelli ara, d amaray amatu i asen-d-yeldin tiwwura iwakken ad yemmeslay yid-sen. tarbaɛt iheddren s yisem n yiselmaden-a ssawḍen-as tiɣerɣert n yicektayen, rnan mmeslayen yid-s ɣef wuguren i d-ttmagaren deg unnar. Si tama-s, amaray amatu n tmehla n usegmi n Tubiret iwɛed-iten dakken s kra n wayen yellan gar yifassen-is ad yettwaxdem di lweqt gezzilen.
Mi d-ffɣen, myefken ttiɛad gar-asen ad d-mlilen ass n ttlata i d-iteddun(azekka), iwakken ad ẓren anda tedda taluft. d acu kan, tikkelt-a, nnan-d “ur nessusum ara alamma nefra-d uguren i yettɛewwiqen aselmed n tmaziɣt.”
Sylia. M