Nuja ideflawen(Schneewittchen/Blache-Neige) d yiwet ger tmucuha n watmaten Grimm d-yesmuḥyet Sεid At Mεemmer si tlalmanit. Ukkuẓ(4) gar-asent tmucuha-yagi, asefru yakkd tezlit i warrac, la ten-tkelles tnaẓurt Tatie Tamcumt, a d-yeffeγ usidi-nsen(t) di taggara unebdu-yagi n 2011.
Akken tt-id-ufan daγen teẓẓel di tγerγert, γur-sen ulac akk ccek, ẓran d tameṭṭut n baba-s i d as-iqedcen akken i teqcict.
Nudan almi yufan timceṭ-nni d-tεemmer am lfuci, tessenta tuccar-is deg uqerru-s, kksen-as-tt-id kan, tuγal-d Nuja ideflawen γer leεqel-is, tessawel-as-d daγen tamacahut n tedyant d as-yeḍran.
Nuti ulsen-as aεeggen, wehhan-tt ad ttefk abeqqa i
yiman-is, a d-taki, ur tettuγal ara yakk a d-teldi tawwurt ula i cciṭan igenni.
Tagelidt tbedd daγen zdat lemri-s deg wexxam, testeqsa-t:
„Ini-d ini-d a lemri
Deg idurar, illel neγ di tniri
Di tγerγert neγ deg igenni
Tella tmeṭṭut, aggur neγ itri
I d iyi-yugaren di ccbaḥa?“
Lemri yenna-yas-d:
“tagellidt n tidet d wulawen
Ulac akk am tidet yemmden
Mazal tif-ikem aṭas aṭas Nuja ideflawen
Izedγen seg idurar akin γer sa Iymuyuden“
Akken tesla tmeṭṭut i wayen d as-d-yerra lemri, tergagi ṣṣura-s si reffu, amzun d zznezla-nni yekkaten di Leṣnam i yewwten deg-s imiren.
Tesmermuγ s ddemmar, teqqar:
« D aqerru-s neγ d aqerru-w tikkelt-a, Nuja ideflawen yessefk ad yafeg leεmer-is a ssiεqa! ».
Teεzel iman-is di yiwet texlambut di lberğ-is, tewwi yid-s yiwet tetteffaḥt igerrzen, teγz deg-s kra n wexjiḍ yuqem am tesraft, teččur-it d lerbaḥ-nni iqebbḍen lerwaḥ, tγum axjiḍ-nni, terra tatteffaḥt-nni tessufuγ-d aseqḍiḍ n yal win ara tt-iwalin, maca, win ara yeččen seg-s kra kan, imiren ara yafeg leεmer-is.
yettkemmil