Imezdaγ n snat n tudrin Iγrayen d At Σica begnen-d lγiḍ-nsen ddurt-agi yezrin as n 16 d 17 unbir 2011 s umdal n tiwwura n uxxam n tγiwant n Ijer s teγzi n sin n wussan. Suturen deg yimḍebren-nsen asiweḍ n lgaz n temdint γer yixxamen-nsen, acku tudrin-agi zgant-d deg udrar, ttenṭarrayen aṭas s usemmiḍ lawan n tegest. Γas akka xedmen tamesbanit-agi n uγlaq n tγiwant, maca ulac idis i d-yemḥaḥden, ulac win i d-yerran i teγri-nsen. Γef waya, ass n 20 unbir 2011, begnen-d lγiḍ-nsen s wudem nniḍen. Tikkelt-a usan-d γer tγiwant n Wizgan anda γelqen axxam n Sonelgaz, axxam n leγrama (les impôts), SLEP, d uxxam n Dayra n wizgan, gezmen ula d abrid aγelnaw i yeccuden gar temdint n Yiεeẓẓugen d temdint n Wizgan akked Ijer di Txerrubt. Tamesbanit-agi tella-d tasebḥit n wass n 20 unbir almi d tamedit n wass.
Ahil n lgaz n temdint n tγiwant n Ijer, yennul 05 n tudrin γef 07 i tesεa tγiwant-a. Tudrin-agi i d-yesfaydin; Iγil n bukyassa, Igerssafen, Mḥagga, Tifrit At Umalek, Buεwen. Ma yella d snat n tudrin-agi ttwaḥegfent s usenfer-agi n Lgaz n temdint. Taluft tura atta-n gar yifassen n yimḍebren εlayen n lwilaya n Tizi-Wezzu.
Islam Bessaci