D ussan n yimuras n cetwa ; d tagnit i tdukliwin tidelesanin d trebbyaε n waddal i wakken ad d-heggint leqdic-nsent. Tikelt-a d tarbaεt n waddal n yidurar « kabylie-Evasion » i d-ilulen ass n 2 unbir 2002 di Buzeggan i yerzan γer temdint n Tigzirt i wakken ad texdem sin wussan (23/24 di duğember 2011) i uselmed d uheggi n wahil-is.
Ahil n tiddukla-a yeεna : Parapente, randonnées, escale,… i lmend n waya εerḍen-d 3 yiselmaden : Ami Said si Burğ Mnayel, Yacine si Bgayet akked Salim si Buzeggan. Aselmed yella-d γef wamek ara yettwaxdem waddal-a d ttawilat i as-ilaqen i wakken ad sbeεden akk uguren i zemren ad d-mmagren mi ara t-tturaren ladγa liḥala n tegnawt…Ma γef lxetyar n temdint n Tigzirt, yenna-d yiwen gar yimḍebbren : ‘’iswi-nneγ d asnerni n tmerrit di temdint-a imi addal-a yezmer ad yettwaxdem rrif n lebḥar.’’ Ma d Salim, amezdaγ n Tigzirt, iwala dakken ‘’rran-d ciṭ n terwiḥt i temdint axater Tigzirt snen-tt kan medden deg unebdu.’’ Ass amezwaru n temlilit, ur bdin ara lecγal-nsen armi sazedgen leryaf-nni n lebḥar.
I usmekti addal n Parapente-agi yessekcem-t-id i tikelt tamezwarut Mass Smail Alian γer tmurt n Lezzayer.
Di taggara, nessaram ad teqqim Tigzirt tzehher am unebdu am cetwa.
D. Said Lhadj