Accueil Tamazight ‘’tameṭṭut d tafat di twacult, d cbaḥa di ddunit…’’

Massa Ahmed Said : ‘’tameṭṭut d tafat di twacult, d cbaḥa di ddunit…’’

4337
- PUBLICITÉ -

Massa Ahmed Said d tanemhalt n uγerbaz amenzu ’’Mimoun’’ n temdint n Tizi Wezzu. D yiwet gar tlawin i d-yesbeggnen d akken tameṭṭut tesεa azal-is di tmetti meεna ma tnuda γef yizerfan-is. Nemlal-itt ass-nni n 8 di meγres, s lferḥ i aγ-d-terra γef kra n yseteqsiyen.

- PUBLICITÉ -

Aγmis n Yimaziγen : d acu i am-d-yessmektay 8 di meγres ?

Massa Ahmed Said : d ass agraγlan n tmeṭṭut. D ass yesεan azal ameqqran. Yal aseggas, smektayent-d tlawin izerfan-nsent i asent-yettwakksen. D yiwet n teswiεt anda i xeddment timesbaniyin i wakken ad ḍelbent tilelli di yal aḥric.

Amennuγ γef yizerfan n tmeṭṭut yemgarad gar tin yeγran akked tin ur neγri?

S umata, tameṭtut tazzayrit tezga tettnaγ γef yizerfan-is, yal ta d iεewwiqen-is di tmetti xas ulamma mgaraden wuguren i d-ttemyaggarent : tameṭṭut ur neγri, ur tesεi ara awal-is gar yimdanen ; tlaq kan i leqdic n uxxam akken d-qqaren ; ad texdem dg uxxam, ad tsusem ; ad trebbi arraw-is mi ara ten-id-tesεu, daya.

Ma d tin yeγran, aql-aγ ad tt-nettwali di tmetti n wass-a. Tezmer i yiman-is. Tettqabal taswiεt akken tebγu tili ladγa di tallit-nni mi bγan ad tt-mḥun At iččumar. Nwala tilawin yesεan tabγest, ttnaγent γef yizerfan-nsent yettwarekkḍen. Ttnaγent γef meḥyaf yellan gar tmeṭṭut d urgaz, γef tmuḥeqqranit n kra n yimḍebbren neγ tukksa n sser.

I umekkan n tmeṭṭut timḍebbert di tmetti tazzayrit ?

Massa Ahmed Said : ass-a llant tlawin i izemren ad sselḥunt yal aḥric n lxedma. Aql-aγ deg-sen nettwali, wwint-d iman-nsent am nutenti am yirgazen. Sunfent kra n wuguren i d-mlalent sdat-sent acku uγalent d timeγnasin mačči d aεeggeḍ kan.

Awal-im aneggaru.

Tameṭṭut, si zik i d-tbeggen tizemmar-is di tmetti tazzayrit. Tqubel Fransa di lgerra-nni γer tama n urgaz. Ur ilaq ara ad d-nettmektay kan tameṭṭut ass n 8 di meγres, tameṭṭut tella yal ass s leqdic-is ama deg uxxam neγ di berra. Tameṭṭut d tafat di twacult, d cabaḥa di ddunit, d arraz sγur Rebbi i yimdanen. Tanemmirt-nwen.

Hocine.M

- PUBLICITÉ -