I wakken ad yeqqim wassaγ i lebda gar yimeγrasen n tegrawla n 54 akked tsuta n tura, tiddukla n yimawlan n yinelmaden s lemεawna n yimḍebbren n uγerbaz ‘’Atmaten Moula’’ n Tala Athmane thegga-d yiwet n tirza γer usalay (musée) n yimeγras n temdint n Tizi Wezzu ass-nni n 19 di meγres 2012. Ihi fursen tagnit yimawlan n warrac-a imi arraw nsen llan deg yimuras n tefsut u ass-nni n 19 di meγres d ass yesεan azal ameqqran deg umezruy n Lezzayer imi deg wass-nni i yeḥbes umennu&gamma,; teḥbes lgirra, i wakken ad xedmen tirza-agi. Γef wakken i aγ-d-nnan, d tikelt tamezwarut i deg-i ffγen yinelmaden-a berra n uγerbaz, d tirza tamezwarut. Aya yessefreḥ nezzeh arrac-nni daymi teddun cennun tizlatin i lemden γer tselmadt nsen n tmaziγt. Mi wwḍen γer umekkan, sersen tameqqunt n yiseğğigen deg usebdad (monument) syin, u s lmendad n yimḍebren n dinna, uγalen γer uwali n temsikent-nni yellan deg usalay-a. Yal tikelt yettili-d umeslay γef wayen ttwalin neγ γef yisteqsiyen n yinelmaden. Dγa, di tugna-agi i tettwali, yella-d umeslay γef umezruy n temsrifegt-agi n lgirra.
Di taggara, u εlaḥsab n wayen i aγ-d-nnan, lemden-d warrac timsirin n umezruy xir n tid-nni i wumi sellen kan gar 4 n leḥyuḍ n uγerbaz. Anwa yeẓran, ahat ad ilin deg-sen wid ara d-yelhun s tira n umezruy s timmad-nsen mačči kan d wiyaḍ ara yettarun amezruy-nsen.
Hocine.M