Wagi d awal i d yefka ML. Mahrouche deg tazwara n tedwilt-is n tmedyezt ass n sed 11 ɣuct 2012 deg rradyu Ssummam imi d-yenced amedyaz Malek HOUD i d-yesawlen ddaqqes n yisfra-ines i yimsefliden n rradyu n Bgayet.
Ur nuɣ ara tannumi nesnemmir imedyazen deg wawal-nneɣ, ass-a ma nexdem-it mačči d lehdur kan akka neɣ iwakken ad neččar tawerqet. Yuklal amkan-is deg tedwilt-a uqbel n wass-a, maca deg nniya-nneɣ akked yiman n tedwilt, win mucaɛen yettwassen dayen yessenta igig-ines deg umraḥ n tmedyezt yerna yuɣ amkan deg yigenni am netta am yitran, ulamek ara nernu ad t-nessali nnig n waya. Yiwen seg yimedyazen ɣef wacu i tbedd tedwilt-nneɣ d asekfel n yimedyazen ileqqaqen akked d tikci n tegnit i wid ur nettwassen akken ad d-inin isefra-nsen rnu ɣef waya awelleh i nettwellih ibujaden. Netta, tiya yezger-itent akk. Lḥasun ass-a amedyaz-nneɣ ur yelli seg wiyi, netta tamedyezt-is tcab teḥḍem, mačči d ccib n temɣer, ur yelli d aḥḍam n taɣert, maɛna d ccib n uɛeqli aḥkim urzin, ma s ufyir i d-yenṭeq ɣas ini-as yezdeq, ma ɣef uḥḍam i iḥuzan isefra-ines aya seg uniwel i ten-inawel s termit, yezzuzer-asen amawal amynut d win yuqan, izewweq-iten s tmeɣrutin akked tunuɣin ara yeǧǧen amseflid ad yessugun tiwlafin n tfelwiyin. Asmi i d-ilul d amedyaz, ussan n temẓi, yettawi-d isefra s uɣanib n win meqqren ladɣa deg talɣa, yettlawi-tt am uḥamad yettḥadaren talɣa n uqnuc i d-yemsel, ḥader ad tuzur ḥader ad tirqiq, ḥader ad tiwzil ḥader ad tiɣzif, ḥader ad tecneq ḥader ad tilwi, akka i tt-yettwali. Asmi meqqer, ussan n ccib,yettawi-d isefra s uɣanib n win meẓẓiyen, dima deg talɣa, yefsi ccedd kra ur necbiḥ, deg tmeɣrut tikwal yettsemmiḥ, teggra-d ccbaḥa deg lmeɛna n wawal, tessenṭi tewjed i usibnen, deg-s ara d-nelwi, deg-s ara d-nawi. Ini-d ay amedyaz: d aɛaned neɣ d abeddel ? D tuzzma neɣ d tujjma ?
Nezmer ad t-nessers mebla akukru seg yifsiḥen / imura i d-yurwen taqbaylit, yeǧǧa-d awal ; imi ccɣel-is mačči d tamedyezt kan, acku yettaru diɣ tullisin akked temwayin, allaɣ-is d tamehrazt, iles-is d azduz, awren-is d tasekla, yak d netta i s-yennan: Tamehrazt yeddzen awal Tenǧer-d seg ubawal Tefka-d acḥal d asefru Di tsekla la tettnawal Deg yiḍ neɣ deg uzal Azduz-is ur iɛeyyu Tamaziɣt-nneq tuklal Ad s-nettarra azal Alma teɣḍel azaglu Isefra-s neṭqen-d lḥeqq, suɣen tilelli, sawlen-d tamacahut, mmektan-d leɛwayed, ḥemmlen tayri, ḥeqqren tamuḥeqranit, ɛban i yiles, rran ccan i Malek, rran-d deg ccan n teqbaylit. Isefra-s d lebḥer n tillas Cban win yeṭṭfen taftilt Ad iẓer akin i tilas Am win ibedden ɣef tiɣilt Bɣiɣ ad d-hedreɣ fell-as Ugadeɣ ad yuɣal d tajmilt Isefra-s mezrurgen Am tziri mezrurga Deg tmetti ttazzalen Ttekksen i umeḥqur tirga Kker fell-ak s asirem Asirem d abrid n targa Nenna-d ayen i d-nenna Walit ma d acekker Netta tura ha-t-an da Ad d-yeftu ɣef wayen i d-nehder Ur yeḍmiɛ sɣur-neɣ cciɛa S lxedma-s i tt-id-lḥer Wis ma d turagt i d-yewwi Seg yigenni i s-tt-id-yeqbel Turagt tuɣal-as d tikci Asefru yeqqel-as d ccɣel Neɣ d ayen-nniḍen maḍi Seg ugeldun i d-icettel
A.N.Y