Di teɣzi n wussan, 26 d 27 seg ctember yezrin, Asqamu Unnig n Timmuzɣa yessudes-d yiwet n temlilit di temdint n Boumerdès anda i d-yessemlal iselmaden n tesdawit d yimaswaḍen n tutlayt tamaziɣt iwakken ad sqerdcen tamsalt n uzday n tjerrumt. Ahil i d-yettwaheggan d amerkanti, imi mačči drus n yisaragen i d-wwin wid yettekkan di temlilit-a rnu ɣur-s askasi i yewwin tiremt n yizem. Timlilit-a d tin i d-yernan mbeɛd tin n useggas 2011 i d-yellan di Zéralda ɣef tjerrumt tanammast akked d tin n Boumerdès yakan di 2010 ɣef uzday n tira. D ayen yeǧǧan ass-a Asqamu Unnig n Timmuzɣa yebɣa ad yaweḍ s anda akken tekres taluft. Imi, iwakken tamaziɣt ad teṭṭef amkan-is deg uɣerbaz neɣ tasdawit yettunefk ad tekseb amawal yezdin tajerrumt d tsekla, mebla ma nettu tira.
D awal dɣa i d-yebder uaray amatu n Usqamu Unnig n Timmuzɣa Y.Merahi uqbel ad bdun lecɣal n temlilit-a, anda i d-yesseḥres ɣef tikli deg ubrid n uzday d useqɛed n yiḥricen yerzan aselmed n tmaziɣt. D rray dɣa i yezdin kra n wid akk yettekkin di temlilit, aya nwala-t deg yisaragen i d-yettunefken. S kra n wid akk i d-yemmeslayen, ɛerḍen akka ad d-awin kra n leryuy ara yessufɣen ɣer tafat ayen akka i d-yesnejmaɛen wid i iqedcen deg unnar n uselmed n tmaziɣt. Mustapha Tidjet seg tesdawit n Bgayet yessukk-d akka tamuɣli wessiɛen ɣef umecwar i d-yewwi uselmed n tmaziɣt d yinadiyen i d-yellan acḥal aya iwakken ad d-ibeggen anerni deg unadi, iwakken ad d-yaweḍ ɣer tallit n wass-a anda i d-yefka nnig n mraw n leryuy ahat ad ilin d wid ara yilin d lmendad i uzday n umawal n tjerrumt n tmaziɣt. Ula d Mahrazi, si tesdawit n Bgayet ula d netta yedda s telqayt deg umeslay-is imi yeɛreḍ ad yesleḍ kra akka n yinadiyen yettwaxedmen iwakken ad ten-icud s ayen yellan deg unnar ass-a. Mačči d yiwen neɣ d sin n yisaragen i d-yewwin awal ɣef taluft-a n uzday n umawal, meɛna askasi i d-yellan d win i d-yessufɣen aṭas n tikta ara yesseddun lecɣal neɣ ahat ara yeldin abrid i temliliyin nniḍen. Djilali Sekhi, si tama-s yewwi-d awal ɣef useqdec n umawal di tneɣriyin anda yesɣar, imi netta d aselmad n tmaziɣt di tmurt n Fransa. Deg wass wis-sin, Salhi Mohand Akli d Ramdane Boukherouf wwin-d awal ɣef umawal n tsekla d win n tjerrumt. Ma yella amezwaru yessudes-d yakan yiwen n umawal n tsekla, wis sin d win yesselmaden tajerrumt di tesdawit n Tizi Wezzu, anda i d-ibeggen tirmit-is deg useqdec n umawal di tanga-a, d wamek i d-yesnulfuy sya ɣer da awalen ur nelli ara yakan. Mačči d win i d-yennan belli akka ara yilin s ya d afella wawalen-a, meɛna yeǧǧa imeddukkal-is d wid akk iqedcen deg unnar iwakken ad walin tifrat iwulmen di cɣel-a. Uqbel ad tekfu temilit-a, aṭas n leryuy i d-yufraren, meɛna ayen i d-yebder Mahmoud Amaoui, si tesdawit n Bgayet, d win i d-ijebden lwelha. Aselmad-a yebɣa yakan ad d-yili Usqamu Unnig n Timmuzɣa di lmendad n widak ara inadin deg temsalt-a n uzday n umawal, ad d-yenejmiɛ wid i iqedcen deg uḥric-a. D ayen iɣef i d-yerra M.Merahi mebla leɛḍil, imi yessuter deg yisdawanen ad as-d-fken yiwen n wahil n temliliyin di teɣzi n useggas 2013 i d-iteddun, iwakken HCA ad d-yessewjed timliliyin. Dɣa ɣef rray-a iɣef tekfa temlilit n Boumerdès.
S. M.