Γas ma lexbeṛ n usekcem n tmaziɣt di windows8 yessefṛeḥ aṭas imaziɣen ama di Lmeṛṛuk neɣ di tmura nniḍen n Tmazɣa d umaḍal, iεdawen n tmaziɣt d tmurt n yimaziɣen ziɣ ččan tirḥi ɣer daxel n wulawen-nsen yeččuṛen d leḥqed : Tikkelt-a mačči d ibeεtiyen i d-yesbanen tisuqas-nsen mgal tamaziɣt, ahat imi ur thennan ara, yerna ṛṛuḥ-nsen aneggaru atan yesselqaf di Suriya, meεna d yiwen seg lumaṛa n tmurt n « uxxam n Ṛebbi », tamurt n lbaṛaka d lxiṛ ideg ttidiren yimeεfan timital n umilyaṛdiṛ Walid ben Talal. Amdan-agi i yesseftin kra di tedrimt-is di tkebbanit n Microsoft, yeεṛeḍ ad yeḥbes takebbanit-a akken ur tessekcam ara tamaziɣt di windows8. Γas ma ur yessaweḍ ara ɣer lebɣi-s imi tamaziɣt dayen tekcem s tira-s ama d tifinaɣ neɣ d talatinit deg unagraw(système) windows8 mbeεd amtafeq i d-yellan ger tkebbanit Microsoft d Usinag n Tussna Tamaziɣt n tgelda n Lmeṛṛuk(IRCAM). Acu kan aṭas n yimdanen i iwehmen deg ṛṛay i yeddem umdan-agi, dɣa aṭas i yerfan fell-as imi imenna ad yeḥbes asenfaṛ alukan ad ixelles tadrimt, wa d isali i d-wwin waṭas n ttawilat n yisallen sihin d sya. Akken yebɣu yili lḥal, d isem-is i d awal-is, »Ṭellal », lmeεna-s s tmaziɣt »Ṭlala », d tuffɣa i ubrid n leqwam, amdan-a d wid i t-yecabn cɣel-nsen ala lefsad, imi imilyaṛdiṛen-agi n Suεudiya yecban Walid ben Talal, limer d tidet d imselmen, tili llethan d yimeɣban yellan s lketṛa di tmura n waεṛaben neɣ xeṛsum wid n tmurt-nsen, deg umkan ma qemmṛen idrimen n lḥeǧǧaǧ d wayen i d-sekcamen deg lpitṛul deg yixxamen n leqmeṛ n Marikan mebɣiṛ ayen i ttseṛṛifen ɣef tlawin. Akken yebɣu yili lḥal, ɣas nutni sεan tadrimt, tamazɣa teffeɣ-asen afus, tamaziɣt attan tura d tunṣibt di tgelda n Lmeṛṛuk, mebla ccek ɣer zdat ad tettwanṣeb di tmurt n Lezzayer akked Libya, ad taɣ amkan-is di akk timura n Tmazɣa.
Mokrane Chikhi