Zik illa yiwen ugellid, d bab n lḥikma ikseb tamusni, isεa yiwen mmi-s ittuṛebba s lεezz, armi ibweḍ d ilemẓi.
Yiwet n tikkelt inna-as: -A mmi tura aql-ik d argaz ilaq ad txedmeḍ.
Mmi-s: -A baba acu ara xedmeγ?
Baba-s: -A mmi ayen ara k-d-yawin asurdi.
Mmi-s: -A baba acu akka ara d-teqqareḍ?
Mmi-s n ugellid ad ixdem γer medden, aεni xussen-aγ yidrimen?
Baba-s: -Ala a mmi lxudma d tacrift ttif frank n tidi-k wala amelyun n wiyaḍ, tegra-d γer medden, ulac wi illan γer yiman-is, ula d nekk d agellid γer medden, lemmer ulac-iten ur ttiliγ ara d agellid.
Tenṭeq-d yemma-s: -Ay argaz ur qbileγ mmi a t-sxedmen medden, ma tebγiḍ ad ixdem, ad ixdem γur-k icbeḥ.
Baba-s: -Susem a tameṭṭut wagi d ccγel-iw, mi ijeṛṛeb lxudma γer medden imir ad ixdem γur-i, qqaren yimusnawen: » tannumi d ṭṭbiεa tis snat « . Bγiγ mmi ad yaγ tannuni d lxudma.
Asmi iṭṭef ugellid di ṛṛay-is, iqbel uqcic ad ixdem, iruḥ tefka-as-d yemma-s asurdi, mi id-tewweḍ tmeddit, ikcem-d baba-s: -A mmi txedmed?
Mmi-s: -Xedmeγ a baba. »
Baba-s: -Acḥal id-tewwid?
Mmi-s: -Wwiγ-d asurdi.
Baba-s: -Zzi-d ziγ ad waliγ asurdi-agi.
Ifka-as uqcic, baba-s mi iṭṭef asurdi-nni inna-as: -Awah! Asurdi-agi a t-ḍeggreγ ar lebḥer si ṭṭaq-agi.
Iḍegger-it, aqcic ittmuqqul, azekka-nni kifkif, yiwet n tikkelt, ikker-d uqcic iruḥ γer uḥddad inna-as: -Bγiγ ad xedmeγ γur-k.
Aḥeddad ifhem tamsalt inna-as: -Iẓra baba-k?
Aqcic: -D netta i ibγan ad xedmeγ.
Aḥeddad: -Ṛwaḥ ad txedmeḍ.
Ibda uqcic axeddim s laεtab d tidi, almi d tameddit, iwwi-d asurdi n tidi-s, ikcem γer baba-s: -A baba aql-i xedmeγ atan frank.
Iṭṭef baba-s frank-nni, iruḥ ad illi ṭṭaq akken a t-id-ideger γer lebḥer aqcic ibda ittru iqqar-as: -Ttxil-k a baba ur ṭeggir ara laεtab-iw, si ṣṣbeḥ nekk ttqabaleγ times d wuzzal fell-as.
Yuγal baba-s ifhem belli s tidett mmi-s ixdem, inna-as: -A mmi acuγer frank n yiḍelli d win n seldiḍelli, ur tecliεeḍ ara mi ten-ḍeggreγ?
Aqcic isusem ifhem tamsalt akken ilaq.
Inna-as baba-s: -Tura a mmi teẓriḍ acu swan yiṣurdiyen, zemreγ a k-sxedmeγ γur-i, ttekleγ ur txelluḍ ara baba-k.
Tamacahutt s wazal-is, qqaren: « Ma fkiγ-ak kilu n sserdin seččeγ-ak yiwen wass, ma slemdeγ-ak amek ara tseggdeḍ, seččayeγ-k yal ass ».
Yahia Yanes