Accueil Tamazight 12 n yimelyaren n zyada i wakken ad yekkfu

TIZI UZZU - Annar amaynut n dabax uḍar n 50 000 n yimekwan

12 n yimelyaren n zyada i wakken ad yekkfu

90

Deg yiwen unejmuɛ, i d-yellan ass-nni n ttlata iɛeddan, 3 deg cutember 2019, deg tzeqqa n yinejmuɛen n Useqqamu Aɣerfan n Ugezdu n Tizi Uzzu, yefka-d unemhal n yilmeẓyen d waddal n TiziUzzu, Mass Rabaḥ Chebbah. Aṭas n yisallen i icudden ɣer unnar amaynut n ddabex uḍar, yesɛan azal n 50 000 n yimekwan. Deg wawal-is, yessefhem-d s telqay timental i d-yeglan s leɛḍil deg usenfar-agi agejdan, yettuɛeggnen ad yekkfu acḥal d aseggas-aya, maca mazal ad iḍul umecwar-is i kra n yiseggasen-nniḍen. Yessefhem-d Mass Rabaḥ Chebbah timental tigejdanin i d-yeglan s leɛḍil deg usenfar-agi, ladɣa seld aneḥbus n umɛellem n tkebbanit n l’ETRHB, Ali Heddad.

Rnu ɣef waya aɣbel n tedrimt. Dɣa tuget n tkebbaniyin yeṭṭfen axeddim, mazal ar tura urɛed ttwaxelsent. Tamentalt-nniḍen, tcudd ɣer kekfu n tfada (contrat) n uxeddim n tkebbanit n l’ETRHB n Heddad, deg 05 mayyu iɛeddan, akked tin n tkebbanit n tmurt n Ṭurk MAPA, deg 30 yulyu iɛeddan. Deg teswiɛt anda ttwaḥebsen kra n yimɛelmen n tkebbaniyin timeqqranin, yecban l’ETRHB, imḍebbren n Uwanak gezmen-tt deg rray n usbeddi n yimḍebbren imaynuten ɣef tkebbaniyin-agi. Dayen i d-yerran asirem ɣer Tenmehla n yilmeẓyen d waddal n Tizi Uzzu, akken ad tennejmaɛ i tifrat n yiɣeblan n usenfar-agi, d tukci n tafada n kekfu n unnar.

Ihi, 44 n yimelyaren n dinar, ad yettwaṣerfen ɣef unnar –agi. Aya, yenna-t-id unemhal n yilmeẓyen d waddal sdat n yiɛeggalen n Useqqamu Aɣerfan n Ugezdu n Tizi Uzzu, d isallen yeɛnan asenfar. Dɣa seg wass-mi i d-yuɣal ɣef uqerru n tenmehla, deg wagur n mayyu iɛeddan , heggan yiwen n leblan lqayen ɣef useddu n usenfaṛ n unnar n ddabex uḍar n 50 000 n yimekwan. Leblan i yettunefken i tkebbaniyin i d-yelhan s lebni-ines, akken ad-fken tafada tamynut n kekfu n usenfaṛ. Ma d ayen i icudden ɣer tiddin n usenfaṛ, dima ɣef leḥsab n yimeḍebber amezwaru n tenmehla, a-t-an deg 82%. Ad yesqam unnar 44 n yimelyaren n dinar, dɣa tella-d zyada n 12 n yimelyaren n dinar s sseba n temsal timaynutin i d-yellan deg usenfar-agi.

Alli Zaouk