Iɛeggalen n tejmaɛt n twilayt n Tubiret sqerden deg temlilit n yimalas yezrin i yekkan azal n tlata wussan sin n yiḥricen i yettemxelbaḍen deg wurrifen. Mbeɛd mi sɣerblen timsal yerzan lakul, anda i d-sseknen tugniwin n kra n yiɣerbazen yenṭerren, d wuguren i d-tettmagar tmaziɣt, zzin s aḥric n tezmert. Tasqamut yettwasbedden yakan tezzi-d ɣef waṭas n sbiṭarat d tzeɣwa n tujya, tuɣal-d s yiwen n rrabul n wazal 35 n yisebtar anda i d-jerden akk ayen ixuṣṣen deg 122 n yimukan i d-ẓran yiɛeggalen n tesqamut-a. Ulamma tadrimt yewḍen ɣer 06 imelyaren n yidinaren i yettunefken deg useggas yezrin i uḥric-a mačči d tin ixuṣṣen, meɛna lixṣas n ttawil d win yeswehmen mačči d yiwen. Tezdeg, imejjayen d wid yetxeṣsen, lixṣas deg umagar n yimuḍan d liḥala n wid yimuḍan yettnusun di sbiṭer d iɣeblan i d-ssuksen yiɛeggalen n tejmaɛt n twilayt i d-yerran tuttra yecban ta: “Ɣer melmi ara yennerni uḥric-a n tezmert?”. Taɣawsa yesserfan wid yellan di temlilit-a d astehzi deg ttawilat yeswan tadrimt tameqrant mebla ma yettunefk-asen kra n wazal, imi qqimen di rrif, yuli fell-asen uɣebbar. wigi, ɣeg leḥsab n wid i d-ixedmen rrabul-a d ayen iwumi neqqar Scanner . Dɣa d ayen i d-ijebden lwelha n yimazen, imi sin seg ttawilat-a ɣlayen i d-tḥella Tubiret, meɛna ar ass-a ur ttwasexdmen ara, imi ulac wid ara ten-yesseddun ! ! Ɣef leḥsab n wayen i d-nnan di temlilit-a, ttawilat-a n scanner tekfa ṭṭmana-nsen uqbel ad ttwasxedmen. Taluft yessekren ahetwir d tin icudden ɣer yimejja yetxeṣṣen ixuṣṣen s waṭas labeɛda di temdint n Tubiret. Meɛna, ayen i yessewhamen dakken di sbiṭer n Lakharia, llan 7 seg yiwet n lḥirfa ! Ɣer taggara n temlilit, s kra n wid akk i d-yemmeslayen gren tiɣri i yimḍebber n uḥric-a iwakken ad yeɣseb tikli deg wayen akka yellan d asenfar ama di M’chedallah neɣ Bordj Okhris iwakken ahat ad d-ɣermen seg wayen yekbel facal.
S. M