Zrin wussan, usan-d wiyaḍ. Ussan yezrin wwin yid-sen tirga n teswiɛt. Ussan i d-yejban wwin tteɛbga n uɣilif. Igenni yecfa i usigna n yiḍelli, yergagi s win n wass-a. Akal yessen amek ttemgaraden igafuren, yal agafur asyax s wacu i d-yegla. Mmi-s n tefsut yegzi tadiwennit yellan gar yigenni d yilem, gar wakal d waman, gar yimɣan d unaɣur. Temɣebbas tedyant !
Zrin wussan wwin yid-sen ayen wwin. Ayen yeddan di temda n tatut, tuɣal fell-as takka n uzulal. Anwa i yesɛan tabɣest ad t-id yessekfel ? Tugdi jehden waccaren-is. Akukru yejhed umara-s. Tirga n yiḍelli tedda d asfel i lemqam n ustehzi. Temɣebbas tedyant !
Jban-d wussan wind ayen i d- wwin. Ayen i d- ɛebban, anwa i yeṣɛan tabɣest ad t-iqazem ? Amaynut tewɛer lɣerza-s. Iberdan cfan i umenṭer n lebɣi. Cfan ɣef tderray, ɣef umḍerkel n uḍar yeḥfan di tikli. Urti sellaw-it yimɣan-is. Mmi-s n tefsut yegzi timmurṣaḍ yessuzer yir ufus ɣef tebḥirin. Aɛeqqa n ṣṣwab yermel deg yixef n uglugel. Temɣebbas tedyant !
Tifeswin ur sɛint ara yiwen wudem. Yemxelbaḍ yiman-nsent deg uqerdac yelmen taḍuṭ n txidas. Azeṭṭa n tegmat yexreb. Grent tilawin yir aɣunja ɣer yir tasilt. Semmum useqqi i d-inawel zman. Medden, xas rfan, nnan : « Akka i d asewwi n tderɣalt. Ayen i d- tnawel labuda ad t- ččen warraw-is . » Temɣebbas tedyant !
Zrin wussan, wissen anida ddan ! Mmi-s n tefsut ibedd ɣef useklu i d- yuɣen aẓar ɣef wakal n usirem. Yecfa ɣef wasmi i as-rran medden leɛnaya. Meṛṛa, ḍemɛen seg-s igumma n tenfalit : Liqa n tlelli, ifer n tdukli, tiskar n teqbaylit. Ziɣ d awal kan. Mačči mi yunet wul, ad d-yennulfu wayen yeccehwa ! Yebɛed wass-nni. Adlis-nni yeččuren d isefra, cnawi-nni i d-yessekren yal d aḥiḥa mmuɣebnen deg wayen i d-iḍerrun. Ihuza-ten uqrif. Yesbek wawal. Ttint tewriqin. Yeggursel lmenṭeq ɣef yiles. Aseklu yewten s lqed ɣer tignaw tekna ljedra-s. Qquren ifurkawen-is. Mmi-s n tefsut yergagi ɣer uẓar-is ! Temɣebbas tedyant ! Zzin-d wussan, wissen anda akka i d- gran ! Iṭij i d- nehren d amaɛlal. Lḥamu-s tefka ɣer wadif, teqreḥ. Mmi-s n tefsut yettmuqul di 127 ifurkawen yeẓlen ddaw ljedra n useklu i d- yuɣen, niqal aẓar, ɣef wakal n usirem. Yettwali rekku amek i d- yetteḥnunuf ɣer yigeḍman-is i teǧǧa tudert. Iḥulfa i tzemrin ideg ur d-tegri tezmert , mi rrant zzit s asɣar. Aɛeqqa yuɣal d aḥeccad. Tizewǧin ɣunzant tara. Tara tenker aẓar. Yeṭṭeglelli lḥal s yir dderz n yiḍarren yelḥan deg ubrid iɣunza wul. Akka i tedṛa d wid yessemgaraden tasa ɣef tasa-s. Temɣebbas tedyant !
Ussan tturaren s lexwaṭer. Tettiɣwis tɣawsa gar yir ifassen. Ussan stufan-d i tlufa, ttarran lebɣi d anekruf. Tteksen i tmiqwa sser-is. Ttarran ijdi ɣer laṣel-is , d aẓru ur nezmir i kra. Mmi-s n tefsut yesla i yidim yettru. Tezweɣ, i d-tessuli tgersa seg wakal yezzan , temlal d tezweɣ i d-yessuli lbaṭel seg tfekka yeḥnunfen di lqaɛa. Anza, idewwir ɣef yifurkan ɣunzan yigumma. Arejrej yuɣal yettnemḍar deg uzal qayli. Tidmi tekcem di tneẓruft hujrent lyali. Ṣmayem yeknef s yijujaḥ n lɛar n tefsut. Yuɣal umendil n tebrek ɣef wurtan. Akk-in, awal yedhem tasusmi. Dihin, tabɣest teṭṭef afus i tugdi . Dagi, lexdeɛ tufa-d aqfafen. Sani i tetteddun akka ? Deg lawan n temḍelt nga tameɣra, di lawan n tumert, i lǧanaza i nger irebbi. Temɣebbas tedyant !
Anda-t lɛez-nni ? Semḥen deg-s wid i t-id yessulin. Anda-tt lhiba-nni ? Surfen deg-s wid i tt-yesburren . Ɣef yifurkawen i d- yeqqimen deg useklu, mɣin-d yir igumma. Iẓmi-nsen yewwi lbenna n ddel. Ṣṣifa-nsen telsa talaba n tɣisit. Tislit n unẓar tewcem igenni s useḍru n lekdeb. Mmi-s n tefsut yewhem amek akka i teḍra d Yebrir. Ahat, yemḍerkal ɣer tderrit i as-d- yessebded Meɣres asmi akken ẓẓur yebges iḥelles. Lemwaji n yir isaffen wwint adlis n yisefra akk-in. Yeḥluli wawal s tmiqwa n tkerkas . Yeṭṭenṭun ccna i d- yettawin meɣrud s nnefs n nhati n wid yebran i layas . Izlan iɣum-iten ṭṭbel imesɛuzzeg. Nnig n yiqerra yezzi uneznaz n tmettant. Temɣebbas tedyant !
Zrin wussan, rran tagut ɣef yiḍelli. Ussan n yir ussan rran tidderɣelt ɣef yiẓri . Ttnezzihen medden deg tmes yuɣen deg yijufar-nsen, tiregwa zeqfen waman deg yiciwi-nsent . Medden ɛebden azulal. Allaɣ iga lemqud i lexyal. Lweḥc inced-d iman-is. Mmi-s n tefsut yessumet iɣil-is, yezdew ddaw useklu yeɛyan di ṣṣber ur d- nettawi . Imɣan tekfa tuttra deg yixef-nsen. Liqa tesbek deg yiẓuran am wadif deg yiɣsan n yimdanen. Imru, yettarun tirga n wul, yecceḍ ɣef tewriqt yugin ansax s yir tadwet. Iwumi tira deg udlis ur yeqqar ḥedd ? Iwumi tanekra ɣef tafrara ur yebɣi ḥedd ? Iwumi nmara ticki ayen i aɣ- iɛelqen d tamara ? Temɣebbas tedyant !
Akk-in, adrar yekna. Taɛjajt i d-ileḥqen terra aɣebbar s allen. Abrid yenneḍ ɣef yiman-is yesseɛreq lewhi i lewhi. Anda akken i d- lulen i mmuten lefḥul. Mmi-s n tefsut yeɛya deg unadi ɣef yixef n tagut, yeɛya tiririt n leḥsab i yitran, yeɛya di lebsala n ccifan. Imi tidet ulac, imi smaḥ ziɣ yella, imi tisusaf d aman, imi rregmat d awal kan, yunef ad zrin wussan xas ulamma ass-a tadyant temɣebbas !
Ait Slimane Hamid