Seg wass mi iyi-gezmen timiṭ, mi d-luleɣ wer taɣratin. Yeɣli-d leḥzen deg uxxam ad as-tiniḍ d axxam n win yemmuten. Yemma meskint tekfa fell-as ddunit teḥqer iman-is, tsell I wawal i tt-id-yesɣulifen awal ẓẓayen tikkwal taẓẓayt n wawal teɣleb tin n tɛekmin. Awal n temɣart yesqedmicen nnig n lkanu, teɣleb tissirt yeẓẓaden ṣṣbeḥ meddi, awal s way-s ttihint tnuḍin di tala d awal‹‹ tettɛennin amzun d aqcic I d-tesɛa›› yemma ur d-tgir ara abzim, ur telsi ara taqendurt tajdidt. kkreɣ-d d taqcict, kulci fell-I megdul, ma xedmeɣ kra acimi, ma ǧǧiɣ-t acim. Yezga fell-I wacimi, leqdic, tiɛekmin, tarda, lexla, rniɣ tisigert d taklit deg uxxam nneɣ, sliɣ qqaren taqcict sendeh-itt, rebbit, wwet-itt, acku d uleqrar ad tekcem ixxamen n medden akken ur aɣ-tesneḥcam ara. umneɣ d tidet akka I d ttrebga n teqcicinZgiɣ ssidreɣ i yixef-iw ɣer lqaɛa. lḥedd-iw d amnar, d tameḥbust war seyya. Xas ma yella wannect-a, ay-agi merra ɣef teḥdayin n taddart, akka tḍerru, d tmetti ur nettaɣ ara abrid ɣer lakul, nekk ḥemleɣ-ten ɛinani, qqareɣ baba ɛzizen, yemma ɛzizen, baba xas ma iḥemmel-iyi werǧin i iyi-d-yenna ḥemleɣ-kem a yelli.. ɣur-neɣ leḥmala nettwali-tt kan, werǧin d-tenṭiq ɣur-neɣ. Wissen ma d taɛeggunt neɣ nerra-as aleggam. A rrbeḥ-iw, sɛiɣ inexḍaben, ḥareɣ melmi ara ssufɣeɣ awal deg tala, akken leḥbab ad iyi-ferḥen, tiɛdawin ad mtent s tismin. Xas akken ur iyi-cawren ara, wicqa baba ḥaca ayen yelhan iyi-ttmenni Seg mi iyi-tenna yemma : “kker ad telḥuḍ», ad kecmeɣ axxam ur ssineɣ, zegreɣ-d I sebɛa n leɛrac, ass-nni cfiɣ-as rekbeɣ aserdun, deffir-I d asensi s lbarud d teɣratin, xas ma assmi i d-luleɣ, ur slawlent, ur wwiten lbarud, lameɛna ass-a ṭṭubnen imeẓẓaɣ-iw, ɣermeɣ-d kulci ɣef tikkelt. alarmi I d ass-nni I lsiɣ taqendurt tajdidt, qqneɣ lḥenni afus-aḍar, ḍliɣ agusim, yemma teffka-iyi-d lɛezla-nni ines n ssdaq i teffer deg usenduq mi iyi-d-teffka tewwurt n uxxam-nneɣ ɣer berra, yemma tettru, nekk ttruɣ alarmi I d ass-nni I walaɣ baba yettru, wamma yemma seg zik d imeṭṭi I d aɛwin-is.” Weltma, xwalti, qqarent-iyi-d : “ay am arezg-im, tettedduḍ, ad truḥeḍ d tislit, kemmi tettruḍ, a-h-a berka, iluleq tislit ad d-teffeɣ s yimeṭṭawen” Aserdun yezreb deg tikli amzun akken yugad ad nedmen imawlan-iw, d aḥwaṣ iyi-d-ḥewṣen, tedduɣ-d, ssikkideɣ ɣer deffir anda akken i ǧǧiɣ ayen i ɛzizen fell-i, ttuɣ iman-iw, tikkelt taneggarut mi i d-ssakdeɣ ɣer deffir, ufiɣ taddart-nneɣ ǧǧiɣ-tt ɣer deffir, tebɛed, yesdur-itt udrar fell-i. taddart tettak-iyi I tayeḍ, seg tiɣilt ɣer tayeḍ, alarmi i d-kecmeɣ taddart ur ssineɣ, axxam ur ssineɣ, argaz ur ssineɣ, tamɣart ur ssineɣ, kulci fell-i d amynut, ḥulfeɣ s kulci yettgalla-d deg-I, yeqqar-iyi-d : “a-h-a kan, nekk yid-m ar d ruḥen iqeffafen-agi” tamɣart temmuger-iyi-d ɣer tewwurt, cfiɣ kecmeɣ s uḍar ayeffus, zxuxmeɣ deg tesga ɣer yidis ayeffus d zelmeḍ, weltma d xalti tweṣṣint-iyi, nekk qqareɣ-d kan : “ih, yerbeḥ !», tfaraseɣ yid-sent, ẓriɣ d akken ad uɣalent ad iyi-ǧǧent weḥdi, am lmeyyet, mi ara teǧǧen deg uẓekka ines, nutni ad uɣalen ɣer yixxamen-nsen. I tura d tidet, uɣaleɣ d taberranit, xarsum deg uxxam-nneɣ tella yemma, wammag da-agi, yemma tebɛed fell-i tikli n yiwen n wass. Ɛni tedɛiḍ-iyi a yemma ad idireɣ d taɣribt neɣ a-h-a-t yedɛa-iyi baba ass-mi lliɣ deg tattalt, yenna-iyi “ad kem-yenfu Rebbi s ya !” ma yella dɣa yella way-a, ddɛawi-nwen am umesmar deg lluḥ. Neɣ a-h-a-t d lmektub, imi nekk seg tid i yumnen yes-s. Steɣfir-u-LLah a Rebbi. Deg yiseggasen imezwura s ya ɣer da, tettas-d yemma d baba, a lferḥ-iw mi ara ad d-tekk deg yimi n tewwurt, amzun d ass n lɛid. Ula d tassariwin n uxxam ḥulfeɣ-asent ula d nutenti ferḥent, iseggasen temseḍfaren wa deffir wa. Baba d yemma, yebɛed wansi i d-ṭṭillin, yettu-ten ubrid ɣer ɣur-i, tikkelt deg useggas. Ctaqeɣ udem n yemma ula deg tirga. Yemma tezha d warraw-is, ma d nekk d taɣribt tettu-iyi. Tura, yiweḍ-d lawan ad d-kkeɣ ansi akken i d-tekka yemma. Seg tadist tamezwarut, amenzu n tasa, ɣer umaẓuẓ bu-tmeẓwanin, werǧin serseɣ amzel ɣer lmaɛun, tezga tayerza tewweḍ s aḥdid, yal ass yettawi-d amaynut. Tamachut n tudert inu akken i tebda i tekfa. Tazwara ines d taklit deg uxxam-nneɣ, tagara ines kif-kif d taklit deg yixxamen n medden. Ayen merra i lemdeɣ ɣef yemma, wwiɣ-t-id yid-i d aɛwin. S ufegrun d uzemzi. S talext d ufrur. Mesleɣ acḥal d ajeqdur. S tsegrut d yifeggagen. S taduṭ d iqerdacen. Kkseɣ acḥal d abernus. Megreɣ-d irden d timẓin. Ɛebbaɣ tiɛekkmin. Nectaq ula d asteɛfu. Seg tazart d yifetwan. Lexlawi d uzemmur. S yiwet n tqendur i useggas. Ɣer tegnint d tliwa. Seg tberra n wulli. Ɣer tarfa n yizgaren. Awal rẓagen. Ttrebga, tfada, lḥif n temɣart d tawessurt, d yirbiben. Atihi n tnuḍin. Argaz ur ntekkes lḥif. Dderya n uɣilif. Ay-agi merra ssegreɣ-ten. A lḥif, aɣilif n bla cceḥḥa. Ctaqeɣ aɣilif aqdim. Yal as yesɛa amaynut ines. Tura, taksumt rebbaɣ teɣli, ḥala aglim yesdukel iɣes. Lḥif n tegrawla. Lmut, tiwuɣa, lLbu d lbecna. Nectaq a medden talqimt. Ttifis d tbuzeggaɣt. Yeglan s wacḥal d rruḥ. Seg Lmulud ɣer Taɛacurt. Seg lɛid ɣer txatemt n Remḍan. Ur nessin tiẓidanin. Nerwa timerẓuga. Nenwa ad yeffeɣ leɛtab ɣer tafat. Tafat d ayen tura, tfat. Qqaren : “Ssber yesɛa tilisa”. Nekk ɣur-i iɛedda akk-in i tlisa Nwiɣ tura d ayen, ad sgunfuɣ, ad steɛfuɣ. Tarwa i d-rebbaɣ meqqerit, ad ikkes fell-i lḥif, ziɣen lḥif yessawal i gmas, mreḥba s tazzla tajdidt. Wwiɣ-as-d tislit i mmi, ferḥeɣ, greɣ-d abzim, ceḍḥeɣ deg tmeɣra, ay a lxir-iw, qrib ad sɛuɣ wid ad iyi-ssawalen a jida. Ziɣemma, teffeɣ-iyi targit mxalfa. Tislit tekkes-iyi amenzu n tasa, alarmi ctaqeɣ ula d awal seg-s, deg taggara, yesrafeg, iruḥ, yeǧǧa-iyi deg yiɣilifen, yugar ccah tawiɣit. Wicqa, awi-d kan ad d-waliɣ mmi deg rrezg. Xas ma nekk, tezgel-iyi ddunnit, rwiɣ leɛtab n lexla, rwiɣ win n uxxam, lḥif n temɣart tawessurt, ur ččiɣ ara ad rwuɣ, tabbudt telluẓ, taɛrurt teɛra, werǧǧin sliɣ awal ḥemleɣ-kem s ɣur win akken lemḥibba n leḥlal, ur ɣulleɣ at-tura, d tawenza-nsen i d-yeffkan. Ad d-asen-yeffk, ad d-asen-yernu, lxir n Rebbi meqqer. Tura aman deg lḥiḍ, tafat deg lxiḍ, aseḥmu d lgaz, fukken fell-awen wanbuxen, fukkent fell-awen tɛekmin, tfuk fell-akent tqendurt n useggas, tura terwam zzhu yal ass, amerreḥ deg tkeryas, win i yuḍnen, yella ddwa-s. lxir-agi d ayla-nwen, ulac win ara went-yeksen, nekkni aqel-aɣ deg taggara n leɛmer, ma nḥuza-d ciṭuḥ a-h-a-t i udmawen-nwen.
Youcef Achouri