Deg yimalas yezrin, tamehla n usegmi n Tubiret, s ddaw leɛnaya n Lwali texdem yiwet n tmeɣra anda tesnemmer inelmaden i d-yufraren deg yikayaḍen yezrin. Deg wawal-is n userḥeb, Mass Liamine Mikhaldi, anemhal n usegmi yerra tajmilt i yinelmaden, iselmaden d widak akk yellan deffir rrbeḥ-agi iwakken ad yini i wid i d-yufraren : « Imal-nwen icudd ɣer win n Lezzayer ». Syen, yuli-d unelmad amenzu i d-yufraren deg ukayad n Bac s 17/20 deg tesnawit n Krim Belkacem n Tubiret. Dɣa d lwali s timmad-is i as-yefkan arraz i yuklal unelmad-a, am wakken i t-isnemmer aṭas s wudem i d-yefka i Tubiret. Iḍfer-it-id unelmad-nniḍen yeqqaren yid-s i d-iḥellan 16/20. Timlilit-a ideg ḥeḍren aṭas n yimḍebbren n twilayt ama d lwali ama d aselway n tejmaɛt n twilayt, ama d wid yellan deg usqamu aɣerfan aɣelnaw neɣ le Sénat. Llan wid n yiɣallen n laman, n lɛesker d waṭas n yinebgawen n lḥerma. Ayen i d-ijebden lwelha n wid akk yellan deg tesnawit n Seddik Benyahia, d arrazen yettunefken, imi d ayen i ḥwaǧen s tidet wigi akka ara iruḥen ɣer tesdawit, ɣer tesnawit neɣ s aɣerbaz alemmas. Tɛedda tallit-nni n tikci n tektabin (tid dɣa ur tteḥwiǧin ara yinelmaden), maca d tadrimt ara yafen. Ayen i d-yettwaheggan tikkelt-a, d yiwet n tedrimt gar 5 d 10 imelyunen n ssantim, almend n tezmilt n unelmad. Iwakken ad d-nesmekti, deg useggas-a, Tubiret tḥella-d 43, 95% deg ukayad n Bac, 46,68% deg BEM d 78,78% deg ukayad n 5ème.
S. M.