Labaεda imi imezdaγ n taddert n Umekrez n tγiwant n At-Zikki, begnen-d lγiḍ-nsen s waγlaq n wexxam n tγiwant ddurt yezrin deg umenzu ctember ideg-i nella almi d ass n 03 ctember s teγzi n 04 wussan, sebba n deqs n wugguren i ttidiren imezdaγ n taddert-agi deg acḥal n yiseggasen-aya, am uggur n yibardan yettwaγen, uggur n tregwa, uggur n wejmaε iḍuman. Akken i suturen azareb n le chateau d’eau n taddert-agi i uḥareb γef tezdeg n waman. Dγa imezdaγ n taddery-agi sutren deg yemḍebren n dayra n Wizgan akken ad-rzun γer-sen γer tγiwant n At-Zikki i usqardec n wugguren-agi s telqey, akken ad-glun s tifrat i yiγeblan-agi iwmi sḥasfen aṭas. Dγa dayen id-yellan, imi ass n 03 ctember, imḍebren taεna temsalt n temnaḍt n Wizgan, γef qaru-nsen aselway n dayra akk d yemḍebren n weqamu n tiknik n temnaḍt-agi, rrzan γer tγiwant n At-Zikki anda i xedmen yiwen unejmuε s wazal-is deg wexxam n tγiwant-agi i yebdan γef 10 n ssbaḥ γef teγzi n 4 tsaεtin d wezgen, s laḥdur n uselway n Dayra n Wizgan, aselway n tγiwant n At-Zikki, imḍebren n tesqamutt Tiknik n temnaḍt n Wizgan d tesqamut n taddert Amekrez. Mbaεd asqardec n yiγeblan-agi merra di yal idisan yella-d umsefhem d lewfaq ger-asen, anda imḍebren n dayra n Wizgan, γef qaru-nsen aselway n dayra mass Messaoud Boularas, εezmen ad-glun s tifrat i yiγeblan-agi mera γef zik lḥal. Syen axxam n tγiwant yeldi tiwwura-s, u dayen i yeskecmen lfarḥ γer wullawen imezdaγ n tγiwant n At-Zikki, xarṣum inelmaden i yettiḥwiğğen aseffeγ lekwaγeḍ deg tallit n tuγallin γer yiγarbazen.
I.B.