Accueil Tamazight Zahia Chikhi : Deg ubrid n Ḥnifa

Zahia Chikhi : Deg ubrid n Ḥnifa

2571
- PUBLICITÉ -

«Mačči d leɣna ay ttɣenniɣ, d ayen iɛeddan felli », akka i teqqaṛ Ḥnifa deg yiwet seg tezlatin-is.  Qqaren wat zik : « D lhem i yettarran amdan yessefray », yal amedyaz  neɣ tamedyazt acu ten-yehman : Si Mḥend Umḥend tessenger-as Fransa imawlan-is, Ḥnifa, tefreɣ-as twenza-s tedder di lmeḥna, Lḥesnawi ijaḥ ɣef lǧal n Faḍma,… Lḥaṣun yal wa, yal ta acu i t (tt)-yehman. Ula d Zahia Chikhi, tacennayt (daɣen d tamedyazt) iɣef  nebɣa ad nemmeslay, ur tt-zgilen ara lehmun n dunnit, d ayen i tt-yeǧǧan seg zik-is tessefray, tessufuɣ-d iḥulfan-is  s tezlatin-is icebḥen aṭas am nettat am yinaẓuren nniḍen. Tlul Zahia Chikhi deg useggas n 1953 di temnaḍt nat Weɣlis (Sidi Ɛic). Mbeɛd iseggasen n lmeḥna i tesɛedda deg uxxam n baba-s d uxxam iɣer tezweǧ i tikkelt tamezwarut, tunag ɣer Fransa anda i as-tettunefk tagnit akken ad tekcem ɣer umussu aduklan ara s-d-yeldin tawwurt ɣer tẓuri. Tettekka deg waṭas n leqdic aduklan ladɣa akked tdukla « Taferka » d tdukliwin nniḍen yesseḥbibiren ɣef yidles amaziɣ di Fransa . Zahia teqdec aṭas di tmeɣriwin d wahilen i d-swejdent tdukliwin-agi  akken ad jemɛent tadrimt i tilibizyu tamezwarut n tmaziɣt BRTV i d-ilulen di lɣerba deg useggas n 1999. Deg useggas-agi yakan, i d-tessufeɣ lalbum-is amezwaru ideg terra tajmilt i lmerḥum Matoub Lounès i yettwaɣedṛen ass n 25 yunyu 1998, tajmilt-a terra-yas-tt s tezlit umi tsemma : « A ṭṭiṛ aberqac ». Deg lalbum-a daɣen ad naf aṭas n tezlatin ideg tecna isefra d yicewwiqen n zik-nni i ttawint tlawin , nettat tessekfel-iten-id, terna tecna-ten s yiwet n lmusiqa tatrart i asent-yernan ccbaḥa i tezlatin-is. D icewwiqen ideg d-tettawi tmeṭṭut taqbaylit ɣef lmeḥna-s d lehmum-is,  ad naf deg-sen tamuɣli talqayant n tmeṭṭut ɣer tmukrisin d yiɣeblan n tudert. S tezlit « Bu leɛyun iruḥ », Zahia tessekfel-d yiwen n ucewwiq d aqdim i d-telqeḍ ɣer temɣarin. Acewwiq-a, yuɣalen d tizlit, yettawi-d s umata ɣef tɛeksi n zzwaǧ, ɣef tin umi tefreɣ twenza ɣef zzwaǧ armi d-tegra ger yifassen n umɣar ur nelli ara d nned-is.  Deg useggas n 2004, tessufeɣ-d Zahia Chikhi lalbum-is wis sin ideg terna tɛawed terra tajmilt i Matoub Lounès akked d Boudiaf deg tezlit umi tsemma « Sil ay iẓri-w ». Am akken daɣen i terra tajmilt i yimeɣrasen n tegrawla n 1954 deg tezlit umi tsemma : « Ccuhada ». Deg lalbum-a wis sin ad naf daɣen aṭas n tezlatin nniḍen ideg d-tewwi ɣef lfeṛḥ akked tmeɣra, tella deg-s daɣen yiwet n tezlit ideg tecna ɣef « Tmaziɣt ». Seg tezlatin daɣen igerrzen i d-tsedda Zahia deg lalbum-is wis sin, tin ideg teqqaṛ : « Berka-k ay ul-iw ». Deg tezlit-a, tewwi-d ɣef lmeḥna i tesɛedda nettat, terna tjemmel-d iɣeblan nniḍen i ttidirent tlawin s umata : am lḥers n yimawlan akked uqeyyed n tlelli n tmeṭṭut i tt-iḥeṛmen ad textir, ad tezweǧ  d win tebɣa, neɣ ad tesɛeddi ṛṛay-is. Meḥsub tizlit-a, d tiɣri n tmeṭṭut taqbaylit ilmend n yizrfan-is daɣen ilmend n tlelli-s. Zahia Chikhi, mazal ad tecnu imi yeččur wallaɣ-is ama d isefra i texdem nettat neɣ d ayen i d-telqeḍ ɣer temɣarin n zik, attan tessewjad deg lalbum-is wis tlata ara d-yefɣen deg waguren i d-iteddun, mebla ccek ad yelhu am yimezwura neɣ kter ! Ma d win i yebɣan ad isel i kra seg tezlatin-is, tzemrem ad tent-tafem di YouToube deg wezday-agi : https://www.youtube.com/results?search_query=Zahia+Chikhi                                                                                                    

- PUBLICITÉ -

Mokrane Chikhi

- PUBLICITÉ -