Ayen yeḍran ussan-agi iεeddan deg lwilaya n Tizi Uzzu yessmektay-aγ-d tidyanin la iḍerrun deg lwilaya n Γerdaya anda sin n yiderman, Imẓabiyen d udrum n Caεabna, zgan d amqellaε.
Ihi, d Rebbi kan i yessren, akken qqaren, wamek ad tekker d tameqqrant gar lεerc n Wat Yiraten akked d imezdaγ n Wasif n Lwed Σisi wid iwumi qqaren ‘’Aεraben n Lwed Σisi’’. Ddurt iεeddan, imezdaγ-agi, γelqen abrid aγelnaw, ssuturen tinezduγin i asen-ṛeggmen yimḍebbren n lwilya deg tγiwant n Yirjen. Acu kan, wid-nni iγelqen abrid εeddan tilas, εlaḥsab n wayen i aγ-d-nnan : sqiṭṭiεen i yimsebriden n Wat Yiraten , kkaten-ten u tekksen sser fell-asen ; yegla-d, waya, ula s lmut n yiwen n yilmeẓi. Mačči d tikkelt tamezwarut i d-yeḍra waya, akken i d-nnan. Tiririt γef tmuḥeqqranit-agi ur tεeṭṭel ara, At Yiraten nnejmaεen u fran-tt d rray nsen : ad d-ssubben γer Lwed Σisi ad d-rren ttar nsen. Mi wwḍen γer din, xas ulamma yeḍra-d kra n cwal, meεna yezwar leεqel d lmeεqul s iqerra n yimdanen. Uγalen mmeslayen s ttwab akked yimḍebbren i d-yerzan s lemγawla γer din. Akka, dγa, i tefra s talwit meεna armi melmi ?
Hocine.M